Yngsti aldurshópurinn á von, dvínandi hrifning á slaufunarmenningu og Metoomálefnum þar, samkvæmt K100 frétt.

Það vakti athygli mína að K100 var með frétt daginn eftir sem heitir "Skiptar skoðanir ungmenna á slaufunarmenningu", þar sem niðurstöðurnar voru á þann veg að femínismi og Metoo sé úrelt fyrirbæri sem muni deyja drottni sínum með þeirri kynslóð sem mest aðhyllist fyrirbærið. Í þeirri frétt kemur fram að Z-kynslóðin (Gen-Z) sé mest fylgjandi slaufunarmenningunni, fólk á aldrinum 20-25 ára, en yngra fólkið síður fylgjandi henni, 16-19 ára. Þó koma aðeins tölur um Z-kynslóðina, 43% fylgjandi, sem þýðir að hlutfallið er mun lægra hjá yngri kynslóðum, þótt sú tala sé ekki gefin upp í fréttinni, sennilega vegna þess að femínismi og Metoo er elítugæluverkefni, örlítils minnihluta sem hefur neytt þessu uppá fjöldann útum næstum allan heim.

Eitt af því merkilega sem kom út úr könnuninni á K100 var að "slaufunarmenningin hefur áhrif á málfrelsi - að fólk hræðist það að vera slaufað ef það fer á móti straumnum". Margt annað gott kemur fram í þessari frétt.

Síðan er það þessi frétt, þar sem voldug fyrirtæki eins og Empower, Viðskiptaráð Íslands, Samtök atvinnulífsins, Maskína og Háskóli Íslands, gera könnun sem gefur þveröfuga niðurstöðu, að meirihlutinn telji Metooumræðuna jákvæða.

Hvort skyldi nú vera trúverðugra og hvað má lesa í niðurstöðurnar?

Þessar tvær fréttir sýna til dæmis að þetta femínismamál og Metoomál er elítumál á heimsvísu á Vesturlöndum. Þetta eru Nýju fötin keisarans, þetta er hinn nýi fasismi sem allir verða að meðtaka til að verða teknir alvarlega, fá brautargengi, osfv. Þetta eru hin nýju svipbrigðafræði og hauskúpuútlitsfræði, sem verður að viðurkenna til að fá viðurkenningu frá fólkinu sem hefur hertekið skólana og alla menninguna á Vesturlöndum, atvinnulífið að hluta til og sérfræðingageirann og fleira til. Þetta er elítan sem heldur á lofti hamfarahlýnun og fjölmörgu öðru, sumt af því á rétt á sér, annað ekki.

Annars tek ég ekkert mark á þessum tölum, 60% telji Metooumræðuna jákvæða. Það er vegna þess að fólk er hræsnarar upp til hópa.

Það vita allir að í einræðisríkjum fær einræðisherrann yfirgnæfandi stuðning, yfir 60% alltaf. Þannig er þetta til dæmis með Norður-Kóreu og einræðisherrann þar, Kim Jong-un. Þannig var þetta í Þýzkalandi seinni heimsstyrjaldarinnar, á Stalínstímanum, og þannig mætti lengi telja.

Þessar tölur, 60% fylgjandi Metoo, þær eru til að réttlæta og sannfæra, en þær sannfæra bara suma. Fólk sem hefur gengið í gegnum skólakerfið hefur samræmda skoðun á ýmsum málum, því þannig virkar hið samræmda skólakerfi vesturlanda, það er stalínískt eins og komið hefur fram hjá til dæmis þeim ágæta þjóðfélagsrýni, Guðjóni Hreinberg.

Eins er það með atvinnulífið. Jafnvel heimilislífið er sama marki brennt. Konur vilja ekki styggja vinkonur sínar og þykjast því sammála, eiginmenn vilja ekki gerast óvinsælir, börnin pæla ekki djúpt í þessu og eru flest sammála foreldrum sínum eins og hefur verið í gegnum aldirnar. Ein skoðun er keyrð í gegn, öfgaskoðun eða ekki.

Í raun býst ég við að þeir sem fylgi femínisma og skyldum málum séu 0.1% til 10%, svona svipað og Frjálslyndi flokkurinn fékk, eða aðrir flokkar sem elítan telur of langt til hægri.

Þegar kommúnisminn hrundi um 1990 myndaðist tómarúm í hugmyndafræði vinstrisins og jafnaðarmiðjunnar. Það tóm var fyllt með því að normalísera, eða venjugera það sem áður var talið til vinstriöfga, harður femínismi og hörð mannréttindi, mikil veruleikastjórnun og annað slíkt.

Þetta gengur útá það að með því að kalla sem flesta rasista, öfgakapítalista, kynferðisglæpamenn, feðraveldissvín og allt annað sem hægt er að gera neikvætt eða finna, er hægt að kasta ryki í augu flestra. Valdið sem kúgar og lýgur leiðir athyglina frá málefnafátækt sinni og hruni hugmyndakerfis síns, jafnaðarstefnunnar og vinstristefnunnar í senn. Valdinu er aðeins haldið með stöðugu áreiti og samfélagslegu ofbeldi í gegnum fjölmiðla og menningu. Prestar og aðrir sem eru of íhaldssamir eru ofsóttir, látnir missa embætti og annað slíkt.

Hversu margir aðhyllast svipafræðina núna? 0.001% eða minna?

Þeir sem lifa af femínismann, það verða sennilega bara íbúar Asíu og Afríku, þar er yngsta fólkið með mesta frjósemina, nokkuð sem búið er að eyðileggja á Vesturlöndum, þeir munu líta svo á að femínisminn hafi verið hið fullkomna útrýmingatól, sem bæði tók til huga og anda og líkama og félagslífs, allra þátta þjóðfélagsins.

En aldrei að segja aldrei. Ef yngri kynslóðirnar verða ónæmar er von fyrir þær, nema svo margt annað er hrunið að það er mjög hæpið.

En burtséð frá því hvaða skoðun fólk hefur á svona málum ætti það að vera ljóst af mismunandi gengi flokka í kosningum og könnunum að kannanir eru ómarktækar. Fólk setur sig oft í stellingar þegar það tekur þátt í könnunum, segir það sem telur að það eigi að segja. Því miður er þannig hegðun líka býsna algeng í kosningum, en minna samt.

Ég tel víst að stuðningurinn við slaufunarmenningu sé nær því sem sagt var frá í ungmennakönnuninni, mikið innan við helming, í hjarta fólks að minnsta kosti, því þetta snýst ekki um ímyndað óréttlæti og að karlkynið sé vont en kvenkynið gott, þetta snýst um sköpunina, að karlar voru skapaðir til að vera ágengir og yfirgangssamir frekar en konur. Þannig er þetta í náttúrunni, og þetta er innprentað í lífið.

Meirihluti telur #metoo-umræðu jákvæða