Kári Stefánsson segir fjórðu bylgjuna hafna

Á fréttaveitunni "Vísir" kemur fram merkileg grein og viðtal við Kára Stefánsson "Ég held að fjórða bylgjan sé komin hér í öllu sínu veldi" (á Vísi) sem hefur látið mig íhuga öll þessi mál betur og sannfærast nokkuð af pistlum Ómars Geirssonar. Þetta viðtal birtist núna í morgun um ellefuleytið, og þar segir Kári að raðgreining smitanna leiði í ljós nýtt mynstur, sem bendi til að smit hafi verið að malla í einhvern tíma og komist framhjá landamæraskimunum, sem er auðvitað alvarlegt mál, því þá er meiri hætta á fjórðu bylgjunni.

 

Annars skal því haldið til haga að ég hef ekki haldið því fram að veirunni ætti að sleppa lausri, verja viðkvæma hópa og skapa þannig hjarðónæmi sem fyrst, eins og Þorsteinn Siglaugsson og Geir Ágústsson hafa frekar verið talsmenn fyrir. Ég er algjörlega ósammála því að kalla deilur um bóluefni einhvern sandkassaleik, enda grafalvarlegt mál og það vita allir að þessi bóluefni voru unnin í flýti og því ekkert nema skynsamlegt að sýna þeim sem hanna þau aðhald og fylgjast með þeirri reynslu sem skapast af þeim, enda langflestir vísindamenn sammála um að full reynsla verði ekki komin á þau fyrr en eftir lengri tíma.

 

Það er miklu frekar sandkassaleikur að bíta sig fastan í einhverja skoðun og hlusta ekki á rök gegn henni. Ég reyni að skipta um skoðun ef mér finnst rök benda í þá átt. Kári Stefánsson kemur með vísindalega þekkingu, og þegar hann segir að eitthvað smit hafi smogið fram hjá landamæravörslunni ber að hlusta á hann og taka hann alvarlega.