Tek undir góða grein frá Frjálsu landi

Það er áhugavert að fylgjast með athöfnum Áslaugar Örnu dómsmálaráðherra. Hún er greinilega ein af þeim sem ekki trúir öllu frá alþjóðasamfélaginu möglunarlaust, og vill opna fyrir viðskipti og glæða íslenzkt efnahagslíf þrátt fyrir þær hömlur sem enn eru í gildu útaf kófinu á heimsvísu. Mér hefur lengi sýnzt hún vera mikið foringjaefni, og ég ætla að endurtaka það hér sem ég fjallaði um í vetur í pistli hjá mér, að mér finnst ekki ólíklegt að hún gæti orðið næsti formaður Sjálfstæðisflokksins. Það er samt áhyggjuefni að skjótast of hratt upp á stjörnuhimininn, margir sem hljóta slíkan frama eru líka fljótir niður aftur, eins og dæmin sanna.

 

Ekki get ég sagt að mér hafi fundizt fljótfærni hennar alltaf gefa af sér rétt mál, en ég dáist að fólki sem sýnir leiðtogahæfileika og verður fyrirmynd annarra. Það er von mín að svona konur þróist út úr hefðbundnum femínisma, þetta er að minnsta kosti sjálfstæði, að treysta á sjálfan sig og taka eigin ákvarðanir, sem er inntak sjálfstæðisstefnunnar að mörgu leyti. Virðinguna fyrir því gamla og góða vantar þó eitthvað, en það er einmitt líka hin hliðin á sjálfstæðisstefnunni, en eins og margir málshættir segja eða tjá í löngu eða stuttu máli, að þeir sem fara of geyst út úr hefðunum geta farið villir vega.

 

Þetta minnir jafnvel á stjórnarhætti Trumps, og þá er ekki leiðum að líkjast, að vera sannur leiðtogi og taka ákvarðanir. Þetta er greinilega gott fyrir hagkerfið, ég vona bara að þetta stefni ekki í hættu góðum árangri í sóttvarnarmálunum hjá Þórólfi og fleirum.

 

Icelandair tekur kipp eftir tíðindin