Gervigreind í hljóðblöndun á tónlist Bobs Dylans og Bítlanna

Ég les reglulega greinar á "Expecting Rain" vefsíðunni, þar sem aðdáendur Bobs Dylans fjalla um allt sem tengist honum og tónlist hans. Þar sem ég er ekki síður Bítlaaðdáandi vakti það furðu og gleði að lesa að nú er komin fram ný tækni sem kennd er við einhvern Peter Jackson og gervigreindarhljóðblöndun. Hún er þannig að hægt er að aðskilja hljóðfæri og setja á margar rásir sem áður voru föst á sömu rásinni í sama mixinu, hljóðblönduninni. Áður var þetta gert upp að vissu marki með því að leggja áherzlu á mismunandi tíðnisvið en þarna mun þetta vera fullkominn aðskilnaður hljófæra.

Snilldarverkið Rubber Soul var tekin upp á fjórar rásir og því mörg hljóðfæri oft á sömu rásum. Paul McCartney hefur nýtt sér þessa tækni til að syngja nýja dúeta með John Lennon handan grafarinnar á tónleikum! Já, tæknin er ótrúleg!

Nokkrar Bítlaplötur hafa notið þessarar meðferðar og vakið athygli og selzt enn meira svona hljóðblandaðar.

Bob Dylan var mjög sérvizkulegur þegar hann tók upp margar hljómplatna sinna, ekki sízt Street Legal árið 1978, en það orð mætti þýða sem ræsisvís eða götufær.

Hann notaði ekki hefðbundið hljóðver heldur trukk með hljóðveri í, og risastór hljómsveit varð að troðast inní þröngt rými þannig að hljóðfæri blönduðust mjög saman. Auk þess gafst lítill tími til að fínstilla græjur fyrir upptöku og menn jafnvel ekki nógu færir í því.

Street Legal frá 1978 er kannski bezta hljómplata Bobs Dylans, textalega að minnsta kosti, full af heiðnum textum og tilvísunum áður en hann frelsaðist til kristinnar trúar, en hún hefur um langt árabil verið mjög umdeild hljómlega og menn vilja gera allskonar breytingar á hljóðblönduninni, losna við bakraddasöngkonur eða saxafóna eða annað sem Bob Dylan gerði í minningu Presleys sem þá var nýlátinn.

Nú opnast sem sagt möguleikar til að hræra í þessari sögufrægu hljómplötu enn frekar.

Ég er þó ánægður með að ég las athugasemdir mjög margra þarna sem voru mér sammála um að þetta væri ein bezta platan með Bob Dylan nákvæmlega eins og hún er.