Áhugaverðir tónleikar í gær

Tónleikar í tilefni áttræðisafmælis Dylans voru í Vídalínskirkju í gær. Þar var ég staddur og skemmti mér vel. Sigríður Thorlacius söng lögin og ég var misánægður með flutninginn, sumt mjög gott, sumt meðalgott og önnur með slakasta móti.

Sigríður er í mörgum tónlistarstefnum góð söngkona en er á heimavelli í jazzinum og er þar framúrskarandi góð. Hún hefur dáleiðandi og seiðandi rödd þegar hún er í essinu sínu eins og Ella Fitzgerald og er ekki þá leiðri að líkjast.

"Pressing On" og "Every Grain Of Sand" fannst mér verst flutt, án gospelkórs. Þau virkuðu einstaklega flöt og litlaus, endurtekningasöm og innihaldslaus endurtekning einhvers sem ekki væri hægt að sanna og aðeins væri persónuleg upplifun, en fáránleg að auki.

Fleiri voru þó lögin sem voru vel yfir meðallagi vel flutt. "I Contain Multitude" var bezt og fyrsta lagið. "Not Dark Yet" var einnig prýðilegt ásamt "Shelter From The Storm" og "One More Cup of Coffee". Hún lifði sig svo inní þessi lög að það var unaðslegt að hlusta á flutninginn, og röddin hæfði lögunum vel.

"Don't Think Twice" og "Blowing In The Wind" voru nokkuð vel flutt, en ég hef heyrt þau svo oft að ég hef lítinn áhuga á þeim lengur.

"Man In The Long Black Coat" var alveg hreint fyrirtak í þessum flutningi, hljóðfæraleikurinn mjög góður og söngurinn.

Ég man ekki eftir fleiri lögum, þau voru ekki mikið fleiri. Þau voru fá og löng, en maður naut þeirra samt.