Fyrir meira en 8200 árum var hlýrra á jörðinni en nú - ekki er vitað um bíla sem ollu kólnun þá. Röksemdir gegn því að maðurinn einn stjórni veðurfari jarðarinnar og baráttunni gegn hamfarahlýnun af mannavöldum.

Ég gleymdi að fjalla um margt í fyrri pistli mínum um þetta. Hér eru atriði sem gleðja fjölmarga efasemdamenn um hamfarahlýnun.

Rannsóknir á jarðvegi hafa leitt í ljós með óyggjandi hætti að flóðasögurnar gætu hafa verið byggðar á náttúruhamförum fyrir 8200 árum síðan þegar snögglega kólnaði á norðurslóðum og Golfstraumurinn stöðvaðist næstum alveg. Sagan um Nóaflóðið gæti verið mýta sem byggðist á þessum atburðum fyrir 8200 árum síðan.

Ástæðan er bráðnun norðurheimskautsins og þegar miklar stíflur vegna bráðnandi jökla brustu í Kanada um þetta leyti. Agassiz stöðuvatnið flæddi þá og breytti hafstraumum.

Atburðirnir áttu sér stað í Hudson flóa í Canada fyrir 8200 árum síðan, en fréttir um þetta komu árið 1999 þegar vísindamenn gerðu þessa uppgötvun.

Flóðið af köldu jöklavatni út í Atlantshafið á örskömmum tíma fyrir 8200 árum var 15 sinnum meira en allur straumurinn í Amazonfljótinu, sem þó er gríðarlega mikill. Þetta olli skyndibreytingu á hafstraumum, Golfstraumurinn dó næstum því alveg, en þó ekki alveg að því er vísindamenn telja.

En rúsínan í pylsuendanum í þessu til að gleðja efasemdamenn um hamfarahlýnun er þessi: Áður en þessi ein fjölmargra smáísalda hófst fyrir 8200 árum vegna breytinga á Golfstraumnum þá var HLÝRRA Á JÖRÐINNI EN Í NÚTÍMANUM. Hamfarahlýnun af mannavöldum hvað?

Að minnsta kosti kom þetta fram í heimildamyndinni um "Fyrstu Svíana" á RÚV, í fyrri þættinum, og þar er stuðzt við vísindamenn sem ekki eru taldir fara með fleipur eða vitleysu af neinu tagi.

Á mjög skömmum tíma, kannski innan við 10 árum breyttist loftslagið úr því að vera hlýrra en í nútímanum yfir í að vera svipað og á "litlu ísöld", sem var um 1700. (Hvar voru þá útblástursrörin og mengandi jarðefnaeldsneytið?).

Þarna dóu margir út og lifnaðarhættir gjörbreyttust.

Þessi smáísöld stóð í um það bil 300 ár en síðan hlýnaði á ný allhressilega.

Það er fleira í þessu sem ég vil bæta við.

Ástæðan fyrir því að ísöldinni lauk fyrir 11.000 árum eða þar um bil tel ég vera komu guðanna til jarðarinnar einu sinn enn. Ekki veit ég hvernig þeir létu jörðina hlýna, en þeir gerðu það örugglega.

Sönnunin fyrir tilvist guðanna og gyðjanna er meðal annars í því fólgin að vísindaleg þekking er í Sæmundar Eddu og Snorra Eddu.

Svo segir í Völuspá: (18. erindi):

 

"Önd gaf Óðinn,

óð gaf Hænir,

lá gaf Lóður

og litu góða."

 

Vísindalega er þetta þannig útskýrt samkvæmt nútímavísindum:

 

Fyrir um það bil 10.000 árum - eða meira - komu guðirnir til jarðarinnar í geimskipum sem sköpuðu norræna menn, komu með þá til jarðarinnar. Fyrir þeim fór Lóður. "(Lá gaf Lóður og litu góða)."

Fyrir um það bil 300.000 árum komu guðir Biblíunnar til jarðarinnar í geimskipum og sköpuðu Adam og Evu, og aldingarðurinn Eden var í Afríku frekar en í Súmer. Fyrir þeim fór Hænir. "(Óð gaf Hænir)."

Fyrir um það bil 3.7 billjónum ára - eða meira komu guðir til jarðarinnar í geimskipum sem skópu fyrsta lífið. Það var frumstætt líf. Fyrir þeim fór Óðinn. "(Önd gaf Óðinn)."

Völuspá kemur með þetta í réttri röð, þróunarsögu lífsins á jörðinni og hverjir eru ábyrgir fyrir henni.

Athugum að orðin þýða þetta sem passar við þróunarsöguna eins og vísindamenn segja okkur hana í nútímanum.

"Önd gaf Óðinn", önd þýðir líf, lífsneisti, einfalt líf, ekki vitiborið líf. Það passar við þetta frumstæða líf sem er talið hafa orðið til á jörðinni fyrir 3.7 billjónum ára. Vísindin og Völuspá eru 100% sammála!!!!!

"Óð gaf Hænir", óður er talinn vera vitsmunir, í þessari merkingu í þessari gömlu íslenzku.

Þetta er 100% í samræmi við niðurstöður vísindamanna í dag. Homo Sapiens er talinn hafa þróazt í Afríku fyrir um það bil 300.000 árum síðan. Aldingarðurinn Eden?

Þarna varð apamaðurinn til, og fjölmörg afbrigði hans, en talið er að þessar manntegundir hafi verið dökkar yfirlitum.

"Lá gaf Lóðurr og litu góða", lá þýðir yfirleitt sjór, en talið þýða blóð eða öllu heldur kynstofn í þessari merkingu, göfug ætt manna, konunglegur ættleggur. Litu góða er góður hörundslitur, sem þýðir ljóst litarhaft að öllum líkindum, miðað við að vísindamenn hafa komizt að því að öll blá augu eru komin frá einni formóður, kannski fyrir 10.000 árum. Hver ætti það að hafa verið önnur en heiðin gyðja frá öðrum hnöttum sem gat af sér svo mörg afkvæmi?

Sem sagt, hvað er betri sönnun fyrir því að Völuspá sé "Guðs orð?" Hvað er betri sönnun fyrir því að Sæmundar Edda sé innblásið "Guðs orð?" en að þetta kemur heim og saman við nútímavísindin? Hvernig í ósköpunum áttu heiðnir fornmenn að geta vitað það sem nútímavísindamenn vita nú um þróun lífsins á jörðinni og mannkynsins um BILLJÓNIR ÁRA, hvorki meira né minna?

Og enn fremur: Er þetta ekki vísbending eða sönnun fyrir því að til voru tryllitæki fyrir 9000 árum síðan sem ollu hamfarahlýnun fyrir 8200 árum síðan? Hverjir komu fram með þessa mengandi bíla nema guðirnir í geimskipum, þegar Lóður kom með okkar fornmenn, fyrstu norrænu mennina og germönsku á jörðinni?

Völuspá er Guðs orð. Í henni koma fram vísindi og sannindi, nokkuð sem á eftir að uppgötva og útskýra vísindalega til fulls.

Fram munu koma fleiri svona heiðin kvæði sem munu hjálpa mannkyninu að þroskast og komast á rétta braut, þegar lífstefnan mun sigra, en ekki fyrr.

 

Athugasemdir

[Hörður Þormar, 29.11.2023 kl. 23:10]

Ekki er mér kunnugt um að nokkur haldi því fram að maðurinn einn stjórni veðurfarinu á jörðinni enda væri sú fullyrðing út í hött.

Ástæður fyrir loftslagsbreytingum eru án efa ótalmargar. Það þýðir þó ekki að maðurinn geti ekki haft afgerandi áhrif á loftslagið enda benda ótal mælingar og rannsóknir til þess. Og jafnvel þótt það væri ekki fyllilega sannað þá er ekki stætt á öðru en að reyna, eftir bestu getu, að sporna við öllum loftslagsbreytingum, það er of mikið í húfi.

Kannski var hlýrra á jörðinni fyrir átta þús. árum. En hvaða afleiðingar hefði það nú ef allir jöklar bráðnuðu og hafið flæddi yfir heimkynni milljarða jarðarbúa, svo að dæmi sé tekið?

Það er grátbroslegt að ráðstefna sem haldin er til þess að stemma stigu við hlýnun jarðarinnar sé í ríki sem sækir auðæfi sín og áhrif til orkulinda sem helst valda þessari hlýnun.    

[Hörður Þormar, 29.11.2023 kl. 23:34]

Djúpt inni í Bruniquel helli í Suður Frakklandi hefur grýlukertum úr dropasteinum verið raðað upp í hring. Inni í hringnum hefur logað eldur.

Ekki var hellirinn mannabústaður en menn geta sér þess til að menn hafi stundað þar einhverjar helgiathafnir. Þessi mannvirki hafa verið aldursgreind og eru þau 180 þús. ára gömul. (Sjá Youtube: Bruniquel).

[Ingólfur Sigurðsson, 30.11.2023 kl. 00:39]

Ég þakka fyrir athugasemdir þínar Hörður Þormar. Mér virðist þær vel ígrunaðar og réttar.

Nei, ég er ekki að halda því fram að mér finnist svona loftslagsbreytingar æskilegar, og það er rétt að þær hafa ískyggilegar afleiðingar.

En ég er loksins að fallast á (sumar) röksemdir félaga minna margra sem eru mjög andvígir loftslagskvíðanum sem RÚV boðar og fleiri.

En þótt það sé rétt hjá þeim að loftslag hefur verið breytilegt, er það eins og þú bendir á ekki stætt á öðru en að sporna gegn slíkum breytingum núna, of mikið er í húfi, og það mun eyðileggja lífsskilyrði svo margra ef það gerist.

Já, fróðleikurinn um hellinn og helgiathafnirnar fyrir 180.000 árum er mjög góður, takk fyrir hann, kemur alveg inná það sem ég fjallaði um.

Að lokum vil ég benda á að Magnús Sigurðsson bloggari hefur fjallað um fáránleika Davos ráðstefnanna bæði á fyndinn og snjallan hátt, og betur en flestir. Flugvélar með kolefnisfótsporið úr afturendanum flytja þangað auðrónanna og ekkert mjakast til gagns.

Það eru orð að sönnu, grátbroslegt. Hræsni og dyggðaflöggun og ekkert af gagni sem hefur hingað til komið útúr þessum ráðstefnum, því stóru ríkin draga sig út og samþykkja lítið sem ekkert, sem mest menga.

Beztu kveðjur.