Ár til að breyta heiminum, þættir í RÚV um Grétu Thunberg.

RÚV hefur sýnt heimildamynd í þremur hlutum um Grétu Thunberg. Dýrðlingsblær er yfir þeim, þar sem hetjan tók sér ársfrí frá skólanum til að bjarga heiminum og mannkyninu með. Ég er ánægður með þessa þætti frá RÚV. Það má vel vera að andstæðingar hennar geri grín að henni, en hún er nú einusinni einn áhrifaríkasti baráttumaðurinn gegn loftslagsbreytingum. (Konur eru líka menn).

Sláandi líkindi eru með Grétu Thunberg sem bjargvætti jarðarinnar og Selenskí sem bjargvætti mannréttindanna. Þessir sérlegu sendiherrar hitta þjóðaleiðtoga og breiða út fagnaðarboðskapinn.

Þegar Gréta talaði fyrir Evrópuráðinu og maður fylgdist með dæsi og andvörpum þeirra sem á hlýddu minnti það óneitanlega á öldungana fyrir senatinu í Róm í Ástríksbókunum, sem höfðu með spillingunni komið sér áfram.

Fjölmiðlar hafa þarna búið til hetjur. Ég er sammála Grétu Thunberg, en samt eins og hún bendir á eykst mengunin sama þótt alþjóðasamningar séu gerðir. Hvað er þá að marka þetta?

Mér fannst býsna gott af Páli Vilhjálmssyni bloggara að benda á líkindin á milli Jóhönnu af Örk og Grétu Thunberg í pistli fyrir nokkrum mánuðum. Þær líkjast, sem helgimyndir alþýðunnar. Það rýrir þó ekki boðskap Grétu Thunberg.

Athugasemdir

[Helgi Viðar Hilmarsson, 20.6.2023 kl. 12:58]

Losun koltvísýrings og mengun er ekki það sama. Mannskepnan stjórnar ekki loftslagi jarðar, a.m.k. ekki athafnir almennings. Rétt er hins vegar að draga úr mengun svo lengi sem það er skynsamlegt. Í Svíþjóð er fólk sem hefur raunverulega þekkingu á loftlagsmálum sniðgengið í fjölmiðlum og almenningi svo gert að taka mark á krakka þegar það mál er til umfjöllunar.

[Ingólfur Sigurðsson, 20.6.2023 kl. 15:07]

Jú, vel athugað Helgi. Enda er pistillinn skrifaður í háðskum tón, þótt ég telji mig umhverfisverndarsinna. Leikrit er sett á svið og Gréta er aðalleikandi. Æ já, Páll Vilhjálmsson hafði rétt fyrir sér, ekki er allt sem sýnist í því leikriti.

[Guðjón E. Hreinberg, 20.6.2023 kl. 16:10]

Það er engin mengun lengur, og Gréta er ekki aðgerðakona heldur tákngervingur sem er markaðssettur af mjög efnuðum áhrifavöldum og yfirtökumafíu. Ekkert okkar fyrirlítur hana sjálfa, þvert á móti finnur maður til með barninu, því hún fékk aldrei að vera barn heldur var hún sett í ógeðfellda heilaþvotta og útungunarvél áður en hún varð að fulltíða konu og síðan gerð að gervidýrlingi davos kommúnismans.

[Guðjón E. Hreinberg, 20.6.2023 kl. 16:12]

... jú ég fattaði háðið, en ég hef Borgfirskan húmor og hann er dáldið sérsniðinn.

[Ingólfur Sigurðsson, 20.6.2023 kl. 20:05]

Við þetta er að bæta að Gréta Thunberg þjáist auk þess af einhverfu og lystarstoli frá unglingsárum til dagsins í dag, og það gerir hana sennilega enn viðkvæmari fyrir messíasarkomplex af þessu tagi - til að bæta fyrir annmarka. Ekki þar fyrir að ég sé á móti messíasarkomplex, ég er haldinn honum sjálfur - og fleiri - getur gert gagn - en þegar manneskja eins og Gréta Thunberg verður almenningseign og skrásett vörumerki Elítunnar þá er betra að útskýra hvað er í boði og í hvers þágu.

Takk fyrir innlitin og athugasemdirnar allir.