Eins manns rusl er annarra manna fjársjóðskista

Bob Dylan gisti hjá kunningja sínum nótt eina í marz 1964 á svefnsófa. Kunninginn var blaðamaðurinn Al Aronowitz í New Jersey. Það borgaði sig fyrir kunningjann að fá Bob Dylan í heimsókn. Aronowitz skoðaði innihald öskutunnu sinnar þegar lagahöfundurinn var farinn. Fann hann þar samankrypplað blað með uppkasti að laginu "Mr. Tambourine Man". Geymdi hann þetta vélritaða blað Dylans árum saman í safni sínu.

Aronowitz lézt 2005 og nú eru erfingjar hans að selja muni úr safni hans.

Búizt er við því að vélritaða síðan í öskutunnunni seljist á allt að 90 milljónir á uppboði! Bob Dylan á marga aðdáendur sem vilja greiða stórfé fyrir slíkt. Menn vita alveg að slíkar tölur eru réttar, því handrit og annað frá Dylan hafa oft farið á uppboð. Hann skrifaði á alla snepla sem hann fann fyrstu árin sem tónlistarmaður og þeir sneplar hafa einatt ratað á uppboð og fengizt góður peningur fyrir.