Málfræðiþáttur. Hættið að tala um "góð gæði". Gæði eru annaðhvort mikil eða lítil!

Bjarni Benediktsson sem yfirleitt talar góða íslenzku sagði í kappræðunum á Stöð 2 í gær, "geta lútið að", en hann hikaði því hann hefur ekki verið viss og grunað að hann væri að beygja rangt. Það á auðvitað að vera "geta lotið að". Sögnin að lúta beygist eins, hvort sem það er fólk sem lýtur, eða eitthvað sem lýtur að einhverju.

Enn vil ég minna á:

Við segjum "bæði epli og appelsínur", því þá notum við hin orðin með, til að vísa í. En ef við spyrjum:"Hvort viltu epli eða appelsínur?", þá svörum við:"Ég vil HVORT TVEGGJA". Við segjum ekki:"Ég vil bæði". Það er enskusletta og vont mál.

Annað sem er orðið alltof algengt og heyrist í fjölmiðlum:

"Góð gæði?" "Betri gæði?" "Vond gæði?" Hvað er nú það eiginlega?

Annaðhvort eru gæði mikil eða lítil, lakari eða meiri, svo einfalt er það. Annað er endurtekning og stagl.