Kvikmyndaiðnaðurinn í Bandaríkjunum er ein rjúkandi rúst eftir að Metooóttinn sigraði þar

Sannleikurinn er sá að perrar og kynferðisofbeldismenn eins og Harvey Weinstein eru forfeður okkar allra, en ekki saklausu englarnir sem þorðu ekki að káfa á kvenfólki eða piparkerlingarnar sem hötuðu karlmenn og eignuðust engin börn.

Sérstaklega á þetta við um Íslendinga. Stórar ættir dóu út í Svartadauða og aðrar komu í staðinn og oft undan fáum aðilum og náskyldum jafnvel.

Það var alsiða í sveitunum að systkinabörn giftust og frændur og frænkur eignuðust haug af krökkum. Urðu úr þeirri skyldleikaræktun snillingar annarsvegar og svo fávitar hinsvegar, en vísindamenn hafa komizt að því að skyldleikaræktun eykur bæði hættu á fávitahætti og erfðagöllum en getur einnig verið jákvæð og ýtt undir snilligáfu og aðra hæfileika, sem liggja í ættum og koma fram síðar.

Nú er Harvey Weinstein orðinn 72 ára gamall og kominn í göngugrind og hjólastól, og verið að níðast á blessuðum manninum fyrir hetjuverkin til forna. Blessaður sóminn gerðist of nærgöngull við leikkonur þær sem hann leikstýrði og vildi véla þær til samræðis.

Weinstein hefur neitað sök um nauðganir og segir að allt hafi þetta verið með samþykki.

Ekki verður það af honum tekið að hann framleiddi vinsælar og stórgóðar bíómyndir.

Nafn hans þýðir Vínsteinn uppá þýzkuna og virðist mér augljóst að hann er af þýzkum ættum, eða ættarnafnið bendir til þess. Hvort hann er mikið vínhneigður er ekki víst hinsvegar.

Hinsvegar ef maður gúgglar kallinn á netinu þá kemur í ljós að hann er gyðingur frá Póllandi. Ekki eru ættir hans raktar lengra aftur, en Pólland er jú vissulega nálægt Þýzkalandi svo sennilega er það rétt að eitthvað komi þetta nafn frá Þýzkalandi.

Hvers vegna komast þessir Metoofrömuðir upp með þetta og eru ekki sakaðir um gyðingahatur úr því að Havey Weinstein er gyðingur, sem ég vissi ekki?

En Vínsteinn þessi er frægur fyrir það að öll Metoo halarófan fylgdi í kjölfar ásakana á hendur honum. Æpandi móðursýki fór í hæstu hæðir og Covid-19 kom beint frá Helvíti niður á mannkynið í kjölfarið, sem refsing fyrir þann glæp gegn mannkyni að leyfa femínistum sem slíkum að fá völd og fá að tjá sig.

Vínsteinn þessi gerði góðar bíómyndir fyrir Vínsteinafyrirtækið, (Weinstein Company).

Naut Hollywood góðs af vinnugleði kappans og góðri verkstjórn í kvikmyndagerð.

Eftir að Harvey Weinstein var settur inn fyrir hetjuverk sín sýktist Helgiviður (Hollywood) svo illyrmilega af kvenréttindaveirunni að það hefur ekki borið sitt barr síðan. Pólitísk rétthugsun, sem er ranghugsun tröllríður þar röftum eins og illur andi úr neðra, sem hún auðvitað er.

Nú vill svo til að ekki er hægt að horfa á kvikmyndir eða sjónvarpsþætti án þess að annar hver maður sé svartur eða pólitískt rétt þenkjandi og boðandi sína hugmyndafræði.

Marvel og DC kvikmyndasamsteypurnar hafa farið illa útúr þessu.

Ég hafði nokkuð gaman af seríunni "Legends of tomorrow", en henni lauk 2022 og hóf göngu sína 2016.

Eins og með femínismann er hægt að skilgreina þróun vísindaskáldsagnaafþreyingarefnis í nokkrum tímabilum. Jafnvel má deila um hvort þetta byrjaði á 20. öldinni eða enn fyrr.

Allavega, þetta eru vísindaskáldsögur fyrir nútímafólk.

En ég hef vit á "Legends of tomorrow", (G0ðsögnum framtíðarinnar, eða Froðsögnum framtíðarinnar eins og réttara væri að nefna fyrirbærið).

Ég horfði á þessa þætti frá upphafi.

Þegar Donald Trump komst til valda 2016 þá stórjókst áhuginn á sjónvarpsefni um vísindaskáldskap og samsæriskenningar. Ráðgátur voru endurlífgaðar, til dæmis.

Legends of tomorrow er hluti af áhuga á þessu. Þær eru afkvæmi þessa áhuga og Arrowverse, Örvaversunum. Græna örin var fyrsta þáttaröðin, byrjaði hún 2012 og fleiri fylgdu í kjölfarið. Verse, seinni hluti orðsins Arrowverse er bæði vísun í versatile, fjölhliða, og verse, erindi, vers.

Orðið versicolour á ensku þýðir til dæmis marglitur, fjöllitur, eða lithverfur, litföróttur, sem breytir um lit, og því eru fordæmi fyrir því að nota orðið vers sem eitthvað sem merkir fjölbreytni, eða kafla.

Morgundagshetjurnar byrjuðu ágætlega en enduðu í fullkomnum farsa.

Tímaflakk og dyggðaflöggun góða fólks komu snemma við sögu sem aðalatriðin sem allt snérist um.

Snérust þessir sjónvarpsþættir einkum og sér í lagi um það að fara til baka í mannkynssöguna og breyta öllum þeim atriðum sem ekki töldust nógu mikið wók, og jafnvel sögufrægum persónum, eða sýna þær í skoplegu og neikvæðu ljósi, ef þær töldust gamaldags, rasistar, karlrembur eða eitthvað slíkt.

Þetta er hluti af gífurlegri sögufölsun kvikmyndaiðnaðarins síðastliðin ár og áratugi. Hefur þetta keyrt svo mjög um þverbak að ég er hættur að horfa á sjónvarp nema fréttir, að kalla má, enda hitt ónýtt drasl, brandari, einskisnýtt last.

Brezku þættirnir um Merlín galdrakarl eru gott dæmi. Þeir voru framleiddir fyrir ríflega 10 árum.

Sögufölsunin versta í þeim þáttum var á þá leið að Gunnvör, kona Arthúrs konungs var svört kona í þáttunum, en ekkert slíkt kemur fram í heimildum og gengur þvert á alla röklega skynsemi um háttsemi fólks á þeim tíma. Blönduð hjónabönd eða sambönd þekktust ábyggilega eitthvað, en hæpið er að það hafi verið innan aðalsins.

En mér fannst Legends of tomorrow hlægilegir þættir í fáránleika sínum og spennandi um leið, eða þar til þeir urðu svo yfirmáta vitlausir að þeir urðu fullkominn farsi án allra gæða.

Söguþráðurinn fór að lokum allur að hverfast um pólitískan rétttrúnað, til dæmis samkynhneigð aðalpersónanna, ellegar þá einhver mjög skrýtin einkenni og hegðun hjá þessum aðalsöguhetjum, að lifna við frá dauðum, breytast í vélmenni, og ekki skeytt um trúverðugleikann. Rann þetta síðan út í sandinn eins og hver önnur haldleysa.

Menningarelítan í Bandaríkjunum er sérstakt fyrirbæri sem tengt er menningarelítum annarsstaðar á Vesturlöndum. Þetta fólk á það sammerkt að það lifir í fílabeinsturni og leikkonur telja sig sérstaklega á hærri stalli en leikarar eða almúginn yfirleitt.

Þetta fólk er allt wók meira og minna. Það er yfir sig snobbað og lítur niður á annað fólk, og telur sig í yfirstétt eins og drottningar og kóngar, ef ekki enn hærra sett en venjulegt yfirstéttarfólk af því taginu.

Harvey Weinstein er hluti af deyjandi menningu innan Hollywood, gömlu karlrembusvínin sem byrjuðu og sköpuðu menninguna sem wókistarnir lifa og hrærast á.

En bíómyndirnar sem hann bjó til voru skemmtilegar.

Það hefur ekki verið sannað með óyggjandi hætti að konur þær sem hann átti samskipti við hafi borið óbætanlegt tjón vegna hans.

Þótt fjöldinn sýkist þá er ágætt að risaeðlur haldi áfram að vera þær sjálfar. Eftir því sem fleiri eru staðfastir í stolti yfir því að vera risaeðla er kannski hægt að hefja réttindabaráttu úreltra.

 

 

Weinstein fluttur í skyndi á sjúkrahús

Athugasemdir

[Rúnar Már Bragason, 10.9.2024 kl. 12:25]

Sammála þér að woke er að rústa Hollywood en vil bæta við að mér finnst það fyrst og fremst vegna lélegra handrita. Það er eins og handritshöfundar fatti ekki að persónusköpun er miðja þess að skilja hvað er í gangi, hvort við eigum að fá samúð eða hata persónuna. Í dag þarf að horfa á K-drama til að sjá persónusköpun.

Dæmi um góðan handritshöfund er Stallone. Hann minnkaði ekkert skemmtanagildið þrátt fyrir að læða inn allskonar hugleiðingum. Horfðu á Rambo II og sjáðu hvernig hann læðir inn andstöðu sinni við einræði og stríð. Í flestum myndum sem hann skrifar þá gerir eitthvað svona en það er aldrei á kostnað persónusköpunar eða framgang sögunnar.

Minna wók og meira af fjölbreytileika mannlífs er það sem fólk vill sjá en Hollywood skilur ekki (BBC ekki heldur).

[Ingólfur Sigurðsson, 10.9.2024 kl. 15:49]

Takk fyrir góðan punkt Rúnar.

Já með Stallone, mikið til í því. Ég hélt fyrir fram þegar Stallone myndirnar væru lélegar, því það orð fór af þeim frá einhverjum gagnrýnendum fyrst.

Síðan er það líka að Stallone er finnst mér meiri leikari en maður hélt, svipbrigðin ekki mikil, en díalógarnir vitrænir þó, samræðurnar, og söguþráður, persónusköpun, alvöru bíómyndir. 

Ofbeldið þó mjög mikið.

Í myndunum hans er framvinda og uppbygging, og hann er mun vandaðri en maður hélt.

Mjög mikið af þessu frá síðastliðnum 20 árum er miklu verra en Stallone myndirnar. Söguþráður er brotinn upp með gimmikki, hvernig er hægt að orða þetta á íslenzku? Söguþráður er brotinn upp með brellum, einhverju sem fangar athyglina. Það getur líka verið að brellan sé klisja, wók klisja, og þá deyr spennan í þættinum, þarna verður aulabrandari sem virkar ekki.

Eða það er svo mikið um þetta að eitthvað passar ekki við fortíðina, mannkynssöguna. Sögufrægar persónur eru hafðar kynblendingar eða af öðrum kynþætti en sagan segir. Það eyðileggur allan trúverðugleika, og það er bara gert fyrir góða fólkið sem vill hafa söguna á ákveðinn hátt.

Jafnvel Donald Trump tókst ekki að endurlífga Hollywood.

BBC var eins og RÚV, byggði á góðum grunni, en wókisminn hefur rústað báðum, hvorum tveggja sjónvarpsstöðvunum eins og betra er að orða það.

Takk fyrir innlit og athugasemd.

[Guðjón E. Hreinberg, 10.9.2024 kl. 22:06]

Allir leikstjórar Hollývúdd og víðar haga sér eins og hann, og allar stjörnur gera fyrir þá það sama og hann, og öll taka þau þátt í allskyns ólifnaði; þegar öll sú mafía sameinast um að afhausa eitt þeirra, þá er verið að fela eitthvað annað, en hvað? Sama t.d. með Bill Cosby.

[Ingólfur Sigurðsson, 10.9.2024 kl. 23:41]

Takk fyrir þetta Guðjón. Já, það hljómar sennilega. Væri til í að lesa blogg frá þér um þetta.

Beztu kveðjur.