"Stórsigur Þjóðfylkingarinnar" frönsku falinn með samsæri óvina þeirra, þegar meira en 60% Frakka hræðast þá og kjósa gegn þeim taktískt

Er það samsæri að kjósa gegn Þjóðfylkingu Le Pen í Frakklandi? Er það alvöru samsæri, ekki samsæriskenning, að nýta sér glufur og galla franska stjórnkerfisins til að eyðileggja eðlilega möguleika frambjóðenda Þjóðfylkingarinnar frönsku við að komast til valda? Já, samsæri er gamalt orð, sem upphaflega hafði jákvæða merkingu úr heiðnu máli, að sverja saman eið að einhverju. Síðan fékk það þessa neikvæðu merkingu, samblástur, að margir rotta sig saman í vondum eða misjöfnum tilgangi til að ná einhverju markmiði.

Hér er ekki allt með felldu. Treysta má útkomunni úr fyrri umferðinni, en seinni umferðin gæti verið einhverskonar svindl og er eitthvað af því taginu, eða samsæri, í orðsins fyllstu og réttustu merkingu.

Ekki fyrr en ég las viðtalið við fréttaritara Vísir í Frakklandi, hana Rósu Björk Brynjólfsdóttur fannst mér ég geta botnað í Frökkum og franska kosningakerfinu.

Hún, sem mér þótti vinstriöfgamaður þegar hún tók þátt í okkar stjórnmálum stendur sig vel sem stjórnmálaskýrandi og fréttaritari.

Eins og fram kemur í viðtalinu við hana er fylgisaukning flokks Le Pen raunveruleg og stöðug.

Hún kallar þetta "stórsigur Þjóðfylkingarinnar frá fyrri umferð", og þau orð eru dásamleg.

Eins og einnig kemur fram í viðtalinu við hana er þetta ekkert nýtt, að hátt í tuttugu ár hefur það sama átt sér stað, að samblástur óttans og móðursýkinnar hefur valdið þessum niðurstöðum. Þó verða hefðbundin stjórnmál alltaf í meiri og meiri vanda, því þau króast æ lengra inní horninu sínu og flokkar eins og sá er Le Pen stýrir fá meira traust, víðtækara umboð, sem síðan er hunzað á einhvern hátt og logið og blekkt af henni og öðrum í hennar stöðu.

Aðeins með því að nýta sér skilning og innsæi Rósu Bjarkar á málefninu getur maður séð þetta í samhengi.

Af hennar orðum og svipuðum skýringum vitrast manni það að Evrópusambandið var aldrei óumdeilt, heldur ekki fyrir 20 eða 40 árum þegar það fór með himinskautum og virtist einrátt, ófellandi og ósigrandi, nokkurskonar keisaraveldi eins og í Stjörnustríðsmyndunum.

Innanfrá hefur gremjan verið að krauma, óánægjan og ósættið. Maðkarnir átu það að innan, og nú rýrnar þess umboð í sífellu, en með því að "þétta raðirnar" eins og gert var í Jóhönnustjórninni er hægt að hanga við völd aðeins lengur!!!

Ljúft var að trúa því sem Donald Trump hélt fram 2021, að hann hefði verið kosinn og kosning Joe Bidens hefði verið svindl. Dómstólar vestanhafs hafa nú skorið úr um að túlkuns Trumps sé bull og að Biden hafi réttilega orðið forseti. Jafnvel dómstólar geta þó haft rangt fyrir sér og þeirra niðurstöður geta verið rangar. Maður leyfir sér að efast um ýmislegt, jafnt það viðtekna og óviðtekna.

En það sem gerðist í kosningunum í Bandaríkjunum undir lok ársins 2020 virðist eitthvað svipað og gerðist í Frakklandi núna og hefur gerzt útum allt. Hræðslan hindraði Trump og hræðslan hindraði Le Pen, samsærin gegn þeim, hatrið gegn þeim.

Vinsældir Le Pen og Trumps eru óumdeilanlegar og vaxandi. Sannleikurinn er greinilega með þeim, og spillingin sem þau tala um kemur þessvegna upp á yfirborðið.

Aðeins þar sem sannleikurinn er sagður og réttlætið kemur fram, jafnvel þótt opinberlega sé sagt að flest sé rangt og lygi hjá Trump, þar aukast vinsældirnar, eins og í þessum "hægriöfgaflokkum". Kjósendur eru ekki vitlausir, þeir vita að þetta er rétt, stór hluti af samsæriskenningum "öfgahægrisins" eiga við rök að styðjast, en ekki er auðvelt að vita nákvæmlega hvernig.

Eins og kemur fram í viðtalinu við Rósu Björk á Vísi verður sífellt erfiðara fyrir hefðbundin stjórnmál að halda völdum í Frakklandi, og víðar.

Upphaflega ætlaði ég að koma með litla og netta athugasemd við pistil hjá kunningja mínum sem skrifar snjalla pistla, en hún varð stærri og breyttist í þennan pistil.

Rasistar og fjölmenningarsinnar verða að fara að tala saman. Samskipti meðal okkar Íslendinga mega einnig batna. Við þurfum nýjan samfélagssáttmála, sá gamli er að verða að engu, sem byggist á hugsjónum jafnaðarmannanna, sem stofnuðu ESB.

Það eru fleiri en ofbeldisfullar fótboltabullur og innvígðir fylgjendur harðlínurasistaflokka sem telja að óöld sé ríkjandi hvað varðar menningarupplausn í vestrinu, ódýrt vinnuafl, mansal, léleg kjör lágstéttanna og margt slíkt sem lýtur að hefðbundnum vinstrihugsjónum, sem þarf að uppfæra með hliðsjón af sjónarmiðum "hægriöfgafólksins", sem er bara venjulegt miðjufólk búið að fá nóg af óstjórn og ósannindum, annarri stefnu en þau vilja.

Útgönguspár: Vinstriflokkar með flest þingsæti