Lisa Marie Presley dó ekki af eðlilegum orsökum. Hún var fórnarlamb megrunartízkunnar, sem er banvæn og hefur lengi verið banvæn.

BBC greinir rangt frá að aumingja Lisa Marie Presley hafi dáið af eðlilegum orsökum. Hún var fórnarlamb megrunartízkunnar, og þau fórnarlömb skipta þúsundum á heimsvísu núorðið, ef vel er að gáð, og fer fjölgandi, því megrunariðnaðurinn er mikið gróðabrask.

DV hefur staðið sig betur en Morgunblaðið að greina frá raunverulegri dánarorsök Lisu. "Lisa Marie Presley sögð hafa verið í öfgafullri megrun fyrir andlátið", er ein frétt þar, og það hefur verið staðfest að er rétt í mörgum öðrum fréttum.

Þetta mega femínistarnir eiga á DV, þarna hefur baráttan fyrir líkamsvirðingu skilað árangri, og finn ég þar samhljóm með femínistum, að vísu. Býst ég við að kvenkyns fréttamenn finni þessar fréttir og hafi samúð með kynsystrum sínum sem lenda í þessum megrunariðnaði.

Lisa var haldin ópíóðafíkn sem stytti líf hennar eins og margra. Einnig var hún háð lýtaaðgerðum og megrunarlyfjum. Hún missti um 25 kíló sex vikum fyrir Golden Globe hátíðina, slík hefur örvæntingin verið að líta sem "bezt" út!! Tveimur mánuðum fyrir hátíðina fór hún í lýtaaðgerð til að líta sem "bezt" út.

"Hún fitnar ekki úr þessu" skrifaði einn í athugasemdum, og "oj" ein.

Beztu greinina um andlát söngkonunnar skrifaði þó blaðakona á DV fyrir fjórum dögum, 14. júlí síðastliðinn: "Lést af völdum fylgikvilla eftir þyngdartapsaðgerð".

Andlátið er talið tengjast samgróningum sem mynduðust í henni eftir þessa þyngdartapsaðgerð. Einnig tók hún inn verkjalyfin Oxycodone og Buprenorphine og Quetiapin sem er notað til að meðhöndla geðklofa. Greinilega ýmislegt sem hefur hrjáð hana þessa heimsfrægu konu og merku söngkonu. Auk þess tók hún inn þyngdarlosunarpillur.

Það leikur ekki nokkur vafi á því að allar þessar skurðaðgerðir og lyf drógu Lisu Marie Presley til dauða, það er alveg pottþétt. Hún fékk þó einnig hjartastopp og ef það er talið "eðlilegt" þá þyrfti einhver eins og Sherlock Holmes að kenna þeim lexíu sem fullyrða það.

Það er alveg augljóst að slíkur dauðdagi hlýtur að vera mun líklegri hjá þeim sem hefur farið í fjölmargar slíkar aðgerðir og tekið inn öll þessi lyf til að grennast.

 

Dánarorsök Lisu Marie Presley gerð kunn