Öll kjarnorkuver ætti að leggja niður og banna kjarnorku.

Hér í upphafi pistils spyr ég mig - og lesendur ættu að spyrja sig að því sama: Hvers vegna koma mjög sjaldan fréttir um dráp á Rússum sem Úkraínumenn eru valdir að? Hvers vegna er Morgunblaðið eins og aðrir fjölmiðlar á Íslandi, fyrir utan Útvarp Sögu og Fréttina alltaf að segja frá sigrum Úkraínumanna á vígvellinum og einhverju svívirðilegu sem Rússar gera? Ef maður vill vera sanngjarn getur maður sagt sér það sjálfur að vísu að Rússar sem fjölmennari þjóð og með meiri hernaðargetu séu í betri aðstöðu til að vinna voðaverk, svona svipað og Ísraelsmenn eru gagnvart Palestínumönnum á Gasasvæðinu. Þó er þetta alls ekki svona einfalt, því pólitíkin kemur inní þennan fréttaflutning á Vesturlöndum og stjórnar fréttaflutningi í gegnum erlendar veitur, sem kosta stríð Úkraínumanna og hönnuðu það frá byrjun, með Selenskí sem sinn lepp, sem hugsar ekki sjálfstætt heldur er strengjabrúða Vesturlanda, og demókrata í Bandaríkjunum þó sérstaklega og djúpríkisins þar, Davosliðsins ofurríka sem HEFUR náð heimsyfirráðum, er ekki einusinni að reyna að ná heimsyfirráðum, það hefur þeim tekizt fyrir allnokkrum árum eða áratugum, enda meiri auður þar heldur en í þjóðríkjunum sem eru kúgað og deyjandi fyrirbæri í alspilltum nútímanum.

Varla er til neitt heimskulegra athæfi en að gera árás á kjarnorkuver eða í kringum það, sérstaklega stærsta kjarnorkuver Evrópu. Fréttir um svona brjálæði vekja upp spurningar hverskonar Helvítisöfl eru að verki í þessari styrjöld og frá hvorum aðilanum þau koma, Vesturlöndum eða Rússlandi.

Maður trúir eiginlega varla svona fréttum. Hvaða gagn gætu Rússar haft af því að valda hræðilegasta kjarnorkuslysi sögunnar á svæði sem þeir ráða yfir? Eða hvaða gagn gætu Úkraínumenn haft af því að valda slíku kjarnorkuslysi á eigin landi? Þetta er svo brjálað að alger örvænting virðist að baki þessu, áróðursbrjálæði um að láta óvininn líta sem verst út frekar en að stuðla að einhverskonar sigri í stríðinu.

Hvers vegna getur ekki alþjóðasamfélagið tryggt frið á þessu svæði og að átök séu ekki þarna í kring? Hvernig eiga íbúar Vesturlanda að hafa trú á styrk Vesturlanda og lýðræðinu úr því að það er ekki hægt að forða heiminum frá svona hryllingi? Sér ekki almennur lesandi og njótandi frétta í gegnum þetta, að eitthvað er bogið við þetta?

Rússar ráða yfir þessu kjarnorkuveri sem þó er á landsvæði Úkraínu, þeir náðu stjórn á kjarnorkuverinu snemma í stríðinu.

Eitt hefur verið gegnumgangandi í gegnum allt þetta stríð: Selenskí hefur biðlað til alþjóðasamfélagsins að senda vopn gegn Rússum og hann hefur gert allt til að útmála Rússa sem skrímsli, sem þeir kannski eru, en hvað er þá Selenskí, sem sendir sitt fólk útí dauðann án miskunnar til að stuðla að sigri sem vinnst ekki án hrikalegs mannfalls?

Það er merkileg tímasetningin á þessu, að Selenskí segir að Rússar vilji valda þarna kjarnorkuslysi á sama tíma og fréttir berast um að stórsókn Úkraínumanna gegn Rússum gangi hægar og verr en þeir vonuðust til og Vesturlönd.

Það er nauðsynlegt að horfa á þversagnirnar í þessu máli. Núna eftir Úkraínustríðið reyna mörg lönd í Evrópu að koma sér upp kjarnorkuverum í stað rússneskrar olíu og gass. Ef slys yrði þarna má búast við miklum mótmælum gegn kjarnorkuverum í Evrópu.

Það sama má segja um Rússa. Ef þeir verða fyrir geislamengun, og það mun gerast ef kjarnorkuslys verður þarna, þá mun undirstaða Pútín stjórnarinnar endanlega rofna og mótmæli gegn einræðisherranum hljóta að enda hans stjórnartíð í kjölfarið.

Þannig að það er mjög erfitt að sjá að nokkur hafi hag að því að þarna eða annarsstaðar verði svona hræðilegt kjarnorkuslys.

Eitt er þó á hreinu: Þetta þjónar áróðurstilgangi Selenskís, sem allt stríðið hefur reynt að fá heimsbyggðina til að hata Rússa og fá alþjóðasamfélagið til að vinna gegn Rússum sem mest.

Á Útvarpi Sögu í þessari viku heyrði ég fréttir um það að Selenskí sé orðinn einræðisherra í Úkraínu og að hann muni ekki leyfa kosningar fyrr en þegar stríðinu er lokið, og þá með sigri Úkraínu væntanlega.

Hvað segir þetta nákvæmlega?

Þetta segir að Selenskí er hataður í Úkraínu úr því að hann þorir ekki að leyfa almenningi að ráða og kjósa, og að stjórn hans er einræðisstjórn og harðstjórn, herstjórn hræðileg. Þetta segir okkur að hann er leppur, dæmigerður leppur að utan frá Vesturlöndum, eins og Hallur Hallsson hefur fjallað um og fleiri.

Pútín er einræðisherra en Selenskí virðist líka einræðisherra!!!

Hversvegna eru fréttir einhliða um þetta stríð á Vesturlöndum?

Er það vegna þess að Pútín minnir á Talíbana um sumt og rússnesk menning?

Er það vegna þess að þetta stríð snýst um að sjá til þess að femínismi og jafnaðarstefna fái ekki samkeppni frá Rússlandi um vinsælt stjórnarfar?

Er það vegna þess að Rússland hefur ógnað auðrónaræðinu sem Davosliðið skipuleggur og stjórnar?

Ég fordæmi bæði Rússa og Úkraínumenn að fallast ekki á að þetta svæði sé friðað svæði og án átaka.

En enginn græðir á kjarnorkuslysi þarna eða annarsstaðar, nema öfl sem vilja gjöreyðingu.

Eru stjórnvöld í Rússland þesskonar hryðjuverkaöfl sem eru svo algjörlega blind? Hversvegna hefur þá stríðið verið hófsamt af Rússlands hálfu, og Rússar ekki sent fullan herstyrk?

Eða er Selenskístjórnin í Úkraínu hryðjuverkastjórn?

Varar við aðgerðum Rússa í kringum kjarnorkuver

Athugasemdir

[Jóhann Elíasson, 6.7.2023 kl. 11:12]

Meiriháttar grein Ingólfur.  Ég hef það eftir áreiðanlegum heimildum að Zelenski (sem Vesturlönd eru búin að taka í dýrlingatölu og hengja "geislabaug" á)ætli sér að gera árás á þetta kjarnorkuver.  Ástæðan er sú að hann gerir sér grein fyrir því að hann er búinn að TAPA stríðinu við Rússa OG NÚ GERIR HANN ÚRSLITATILRAUN TIL ÞESS AÐ DRAGA NATO "FORMLEGA" INN Í STRÍÐIÐ, ÞAÐ ER HANS EINA VON NÚNA.........

[Guðjón E. Hreinberg, 6.7.2023 kl. 18:19]

Við þurfum fleiri kjarnorkuver, og þá helst Thorium kjarnorku, og einnig athuga fullyrðingar James Lovelock um endurnýtingu úraníums fyrir minni kjarnorkuver.

Afsannið yrðinguna ...

[Ingólfur Sigurðsson, 7.7.2023 kl. 08:42]

Þakka ykkur fyrir. Ég er að reyna að hvetja fólk til að virkja lýðræðið, hætta að vera þolendur. Ég veit að fyrir ykkur vakir það sama.

Manni blöskrar hvernig verið er að leika sér að fjöreggjum þjóðanna. 

Áður en mannkynið sprengir sig á steinöld aftur ætti það að viðurkenna að það hefur ekki meiri þroska en steinaldarmenn og hætta tæknibrölti.