Nýju fötin keisarans, ráðstefna Evrópuráðsins

Ég fjallaði um það á mánudaginn að Evrópuráðið sem hingað mætir í næstu viku hefur ekki vald til að tryggja jarðarbúum öryggi, með því að láta stríðandi fylkingar í Úkraínu hætta að berjast í kringum stærsta kjarnorkuver Evrópu, og láta það hafa rafmagn í gegnum fleiri en eina varalínu.

Léleg og nánast engin viðbrögð við greininni, nema frá einum góðum manni sem hefur kristnina til að styrkja sig, þau sýna að þjóðin er á hræðilegum stað kúgunar, og heimsbyggðin öll. Ef allt væri eðlilegt væri almenningur á Vesturlöndum búinn að stöðva þetta stríð með mótmælum, búinn að fella allar ríkisstjórnir sem styðja Úkraínu, því þær ógna öryggi heimsbyggðarinnar með því að stigmagna stríðið.

Hversvegna eru þær fréttir mest áberandi sem fjalla um íþróttir og annað fánýti á meðan mikilvægustu málin eru hunzuð?

Ég er að segja að þótt stríð séu fyrirbæri úr fortíðinni og groddaraleg, þá verða að gilda í þeim leikreglur í samræmi við kjarnorkuöldina sem við lifum á og annað slíkt, bæði Pútín og Selenskí ættu að fara eftir þeim meginreglum að berjast annarsstaðar og tryggja öryggi á þessum svæðum þarsem kjarnorkuver eru. Það er algert forgangsmál, og þótt herforingjar og aðrir valdafíklar séu montnir af því að vera risaeðlur, þurfa risaeðlur stundum að læra og þroskast, verða betri, upp að einhverju marki, vonandi.

Maður spyr sig útaf þessu hversu fánýtt það er hjá Evrópusambandinu og öðrum alþjóðastofnunum að koma á alþjóðalögum sem eru ekki virt nema af sumum.

Yfirborðsmennskan, hræsnin og yfirvaldskúgun þessara þjóða sem hingað koma í næstu viku verður þannig til sýnis bókstaflega þá, eins og "Nýju fötin keisarans", en það er líkingamál yfir það sem opinberlega á að trúa á, en er í raun og veru innihaldslaust rugl, gegnsætt og ekki neitt, og almenningur veit það en viðurkennir ekki.

Þetta er allt orðið svo fáránlegt. Kvartað er yfir því að Donald Trump og hans fólk lifi í blekkingabúbblu og hliðarveruleika sem eigi sér enga stoð í annarra veruleika, og Pútín og hans fólk líka, en það sama á við um Evrópuráðið og þessa vestrænu valdafíkla, sem hingað koma til að hreykja sér hátt, en hafa ekki vald til að tryggja að þetta stríð endi ekki með gjöreyðingu, þetta fáránlega og hryllilega stríð sem Vesturlönd hófu 2014, og demókratar í Bandaríkjunum, Obamastjórnin, og fleiri, með staðgengilsstríðinu í Úkraínu, sem hefur nú stigmagnazt uppí þriðju heimsstyrjöldina, að margra áliti.

Ábyrgð Vesturlanda er slík í þessu að þessir leiðtogar geta ekki hunzað hana.

Hversu geðveikir og veruleikafirrtir verða einstaklingar í okkar heimshluta að vera til að trúa jafnaðarfasistunum sem eru við völd? Er hægt að gera öll Vesturlönd geðveik með stjórnendum eins og nú eru við völd og sem hlýða auðrónum? Já, greinilega, því miður.

Í því ljósi verður allt fáránlegt og öfugt. Í því ljósi verða geðsjúklingar trúverðugir en ekki yfirvöldin sem eru raunveruleikafirrt, og sem krefjast þess að fréttirnar séu þannig.

Hvar er virðuleikinn sem Evrópuráðið heimtar eða trúverðugleiki þess og hvernig getur það heimtað slíkt af okkur eða öðrum?

Hvort eru leiðtogar þess trúðar, fúlmenni eða hetjur?

Það er barnið sem þorir að segja að keisarinn sé nakinn. Allir sjá það, en þeir fullorðnu læra að leika í leikriti lyganna og prjálsins.

Geðsjúkdómar eru ruslakista fyrir það sem erfitt er að flokka. Það sem skilur að snillinga og geðsjúklinga er árangurinn, þeir fyrrnefndu ná árangri með geðveiki sinni en þeir síðarnefndu ekki. Þetta er skilgreining sem ég heyrði í einhverri bíómynd, en þetta er einhver alþýðufrasi sem er sannari og réttari en margt annað, og þetta lifir enn í vitund fólksins sem alþýðuvísindi.

Það var Geir Ágústsson sem skrifaði um það nýlega að þeir sem kusu Hitler hafi ekki verið geðveikir heldur venjulegt fólk. Hvað má þá segja um almenning sem trúir Evrópuráðinu og öðrum alþjóðastofnunum sem verða sífellt fátækari af völdum og trúverðugleika í augum fólks?

Það er eitt sem vantar inní þá umræðu. Heilt þjóðfélag getur vissulega orðið geðveikt. Dr. Helgi Pjeturss skrifaði um að þjóðfélög líktust líkömum, ein hugsun, ein samstilling, og hann líkti stríðum við flensur eða aðrar pestir sem ganga yfir og geta þó dregið sjúklinginn til dauða í einhverjum tilfellum.

Þegar jafnaðarfasistar nútímans missa völdin og trúverðugleikann í einu máli, einsog þessum stríðsrekstri, þá verður almenningur að hugsa önnur mál út til enda, fatta að lygar og blekkingar umvefja aðra málaflokka og opinberar skilgreiningar sennilega og viðurkenndar, bæði í vísindum, menningu og listum, og allskonar greinum.

Þetta er sérlega áberandi í sambandi við launin sem fólk fær eða bæturnar, eða hversu hátt vinna fólks er verðlögð, eða leti fólks og vinnuleysi eða óvinnufærni.

Sagt er að bankastjórar fái ofurlaun því þeir beri svo mikla ábyrgð. En það má aldrei gleymast að þegar sérfræðingar ofurlaunaðir urðu uppvísir að blekkingaáróðri gjörsamlega innantómum fyrir Hrunið 2008, þá létu þeir sig hverfa, fóru til útlanda eða í lítt áberandi störf. Hvar var þá ábyrgð þessara hámenntuðu og virðulegu einstaklinga sem kröfðust virðingar og að trúað væri því sem þeir (og þær) sögðu?

Nei, við megum aldrei gleyma því að launum er ranglega skipt. Það er fullkomin þvæla að sumir beri meiri ábyrgð en aðrir fyrst svona er í pottinn búið. Jú, fólk ber mismunandi mikla ábyrgð, en kannski bera einhverjir meiri ábyrgð sem ekki hafa völd, sem fá ekki nægileg laun, og ættu að vera ríkir í stað arðræningjanna, svo maður noti nú gamla og góða orðalagið sem kommarnir notuðu, á meðan þeir voru sæmilega heiðarlegir og venjulegir, miðað við allt.

Eina afsökunin er sú að við lifum í alþjóðlegu kerfi, og viljum herma eftir því sem gerist á öðrum Vesturlöndum.

Ráðstefna Evrópuráðsins mun snúast um að hylla Danakonung (elítuna í Evrópu og aðra demókrata), svo notað sé orðalag úr fortíðinni, og reyna að skrímslavæða Pútín og aðra Rússa enn meira.

Arnar Loftsson hefur skrifað um fjölpóla heim. Það þýðir í raun að Vesturlönd eru bæði að missa völd og trúverðugleika.

Þessir leiðtogar sem koma í Hörpu í næstu viku eru farnir að minna á skrípakarla og skrípakvendi, eða leikbrúður fyrir drengi og telpur. Þetta er allt eitt stórt leikrit, nema sífellt færri fylgjast með og hafa gaman að því. Vesturlönd eru að skreppa saman og tapa. Mannfækkunin er slík að öllu er haldið gangandi með innfluttu vinnuafli.

Á mannamáli væri það orðað þannig að Vesturlönd séu hrunin, og minni á Rómarveldi þegar það var alveg við það að liðast í sundur, úrkynjað í drasl og á valdi villimanna.

Það þarf nú enga snillinga til að fatta þetta.

Er það ekki bara tímaspursmál hvenær koma fram flokkar á Íslandi og annarsstaðar sem fá feykilegt fylgi og rústa flokkum sem nú eru við völd? Enginn veit hvort þeir verða langt til hægri eða vinstri eða annarsstaðar á stjórnmálalitrófinu.

Ef almenningur á Vesturlöndum vill ekki slíkar byltingar og stendur með þessum jafnaðarhugsjónum sem Rúv er uppfullt af í raun verður að krefjast þess að öryggi kjarnorkuvera á heimsvísu sé tryggt, og að spilltar leppstjórnir eins og í Úkraínu raski ekki heimsfriðinum og öryggi jarðarbúa í framtíðinni, svo nokkuð sé nefnt sem skiptir miklu meira en íþróttir og annað fánýti sem er mest í fréttunum þessa dagana.

Annað sem ekki má gleymast eða týnast í fánýti.

Á þriðjudaginn, 9. maí 2023 birti DV þessa grein á vef sínum: "Lætur "góða fólkið" og innflytjendur heyra það - "Ísland skuldar 0kkur ekkert. Það eru forréttindi en ekki réttur að fá að búa hér".

Vitnað er í grein í Morgunblaðinu eftir Rajan Parrikar, upphaflega frá Goa í Indlandi, en er nú búsettur á Íslandi. Hann lýsir því hvernig vinstriflokkarnir stunda pólitík sem ekki er sjálfbær, nokkuð sem Ásmundur Friðriksson og miklu fleiri hafa fjallað um, en mest lent í mótvindi og deilum við Pírata og fleiri háværa sem fordæma hefðbundin sjónarmið.

En það sem er stórmerkilegt er að 65 hafa komið með athugasemdir við DV greinina og langflestir eru SAMMÁLA Rajan Parrikar en ekki ósammála. Nú mætti spyrja sig hvort tími Íslenzku þjóðfylkingarinnar sé upp runninn og tími Frelsisflokksins?

Er nú almenningur að vakna um þessi mál, þannig að ekki gerist það sama og gerðist í Svíþjóð, allt fullt af gettóum og óeirðum?

Ég hef tekið eftir því að DV reynir að fela fréttina, setur hana mjög neðarlega, en þar er ekki lokað fyrir athugasemdir, en þannig eru viðbrögð þeirra oft þegar almenningur stendur með femínismaforingjunum þeirra.

Ég spyr enn, er tími Íslenzku þjóðfylkingarinnar loksins kominn og tími Frelsisflokksins? Hvað er að gerast í grasrótinni?

Óvænt í stóru hlutverki á leiðtogafundinum

Athugasemdir

[Ómar Geirsson, 11.5.2023 kl. 16:35]

Blessaður Ingólfur.

Á mörgu er stiklað, að baki liggur mikil pæling og hugsun.

Af hverju er öllum sama, það er stórt spurt, ef þú trúir ekki á almenna skilgreiningu á " Í því ljósi verða geðsjúklingar trúverðugir en ekki yfirvöldin sem eru raunveruleikafirrt,", það er að geðsjúklingar geti haft rétt fyrir sér en ekki ráðafólk, þá máttu alveg íhuga rödd þess kristna, og slepptu öllu "geð-" úr því samhengi.

Mundu aðeins þá stórgóðu mynd um Náin kynni af þriðju gráðu, og settu þig í spor þess meinta geðsjúka sem byggði fjall í betri stofu síns heimilis, augljóslega kolklikkaður, eða kannski var hann að reyna að tjá eitthvað sem hann gat ekki tjáð í orðum, jafnvel ekki í hugsun, en byggði samt fjallið úr leir.

Kannski hefur firring nútímans gagnvart yfirvofandi, augljósum hættum verið lýst fyrir um 2000 árum, í bók sem ennþá er kennd í trúarbrögðum vesturheims, þó mikið hafi fjarað undan henni.

Ekki að ég hafi nokkra glóru, en ég er samt hugsi yfir samsvöruninni á milli forna orða og þess sem er að gerast í dag.

Við lýsum kannski fjallinu með mismunandi orðum eða áherslum, vísum líklegast í ólíkan hugmyndarheim.

En Ingólfur minn, kommon, orð þín, eða kannski réttara sagt tilraun þín til að tjá hugsanir um eitthvað sem ætti að blasa öllum við, en virðist algjörlega vera hulið meinstrím umræðunni, þau  hafa vægi, og missa ekki vægi þó fáir, örfáir lesa sér til skilnings.

Auðvitað er hægt að orða allt miklu betur, eða sjá sömu hluti með mismunandi augum, sjónarhornum, eða eitthvað. Það var þess vegna sem dæmisagan um blindu mennina þrjá og fílinn var búin til.

En þú reynir allavega.

Aumingja þeir sem reyna ekki, svona í ljósi þess að það er allt undir.

Og það allt er framtíð barna okkar.

Þinn er heiðurinn Ingólfur, skömmin er annarra, en alls ekki allra.

Í því felst vonin.

Kveðja að austan.

[Jóhann Elíasson, 11.5.2023 kl. 20:26]

Ég hef orðið var við það sama.  Svo virðist vera að ef fólk þarf eitthvað að hafa fyrir því að skilja það sem um er fjallað þá hefur það lítinn sem engan áhuga en ef það' koma fréttir um að einhverjir þekktir séu að draga sig saman verður það stórfrétt og enn stærri ef þau hætta saman.  Menn verða bara að sætta sig við það að eftir því sem hlutirnir skipta minna máli og minna þarf að hafa fyrir því að meðtaka þá, því meiri athygli fá þeir.  Svo flýtur fólkið bara sofandi að feigðarósi.....

[Guðmundur Örn Ragnarsson, 11.5.2023 kl. 21:40]

Leiðtogaráðstefnan í Hörpu í nærstu viku verður um að leiðtogarnir ætla að ítreka eftirfylgd sína við Satan, höfðingja þessa heims, þótt menn viti að leiðsögn hans leiðir okkur beina leið til Helvítis.

Djöflinum, hefur ekkert fram að færa nema lygi, og það vitum við en fylgjum honum samt í lyginni, því enginn vill verða í fyrstur til að rugga bátnum af þrælsótta.

Hinn djúpvitri H.C. Andersen sýnir okkur fram á í barnaævintýri, hvernig ótti og hræsni hins almenna borgara leiðir hann til fljóta sofandi að feigðarósi, fremur en gera iðrun.

Keisari heimsins er nakinn.

Aðeins lítið barn á enn fölskvalausan kærleika í sínu hjarta og er nógu saklaust og einlægt til að segja Sannleikann því það þekkir ekki þrældóm óttast.

15 Menn færðu og til hans (Jesú) ung börnin, að hann snerti þau. Lærisveinarnir sáu það og átöldu þá. 16 En Jesús kallaði þau til sín og mælti: Leyfið börnunum að koma til mín, varnið þeim eigi, því að slíkra er Guðs ríki.

17 Sannlega segi ég yður: Hver sem tekur ekki við Guðs ríki eins og barn, mun aldrei inn í það koma. (Lúk. 18).  

Dónald Trump er nú barnið sem bendir á að Keisarinn sé nakinn.

Sjónvarpsstöðin CNN verður aldrei söm eftir að Trump fyrrverandi forseti kom fram í viðtali á Stöðinni í gærkvöld, miðvikudag 10. maí.

Þátturinn stóð yfir í rúma klukkustund þar sem þáttastjórnandinn, Kaitlan Collins lét dynja á Trump spurningar og fullyrðingar, sem áttu að sýna hinn fyrrum forseta í skuggalegu ljósi.

En þetta snérist allt í höndum Collis því Trump fór með algjöran sigur af hólmi á öllum sviðum.

Niðurstaðan var sú að þeir áhorfendur sem eru repúblikanar og óákveðnir kjósendur, létu í ljós ánægju sína með Trump og fögnuðu honum ákaft.

Barnsleg og einlæg svör hans réðu úrslitum.

Strax eftir þáttinn var meira að segja ráðist af hörku á CNN af háttsettu fólki og öðrum meginstraums fréttastofum fyrir að gefa Trump slíkt tækifæri til að tjá sig þannig á vettvangi sem þessum.

[Ingólfur Sigurðsson, 11.5.2023 kl. 23:38]

Þakka þér mjög gott innlegg Ómar. Þú hefur einmitt oft haft þann hæfileika að orða hlutina þannig að margir skilji, þótt ýmsir komi og segist ósammála. Þetta er eins og þú réttilega orðar það, tilraun til að túlka áhyggjur og hneykslun á ástandinu, en í grein minni er mörgu blandað saman og sumt af ólíkum tegundum, en allt tengist það saman með því að ég tel að því hafi ekki verið veitt athygli eða útskýrt þannig að fólki ætti að koma það við.

Ég held einmitt að þínir hæfileikar liggi í því að ná til margra út fjölbreytilegum stjórnmálaflokkum.

Ég þakka vel fyrir skynsamleg orð og viðurkenningu á tilraun til að fjalla um mörg mál, sem hefðu mátt fá meira pláss í sérstökum pistlum og ekki bara hér. En það er þá hægt fyrir aðra að bæta um betur, eða þá mig, ef ég finn nýja fleti.

Vonandi að þú sért aftur að verða virkur.

Kveðja að sunnan.

[Ingólfur Sigurðsson, 11.5.2023 kl. 23:40]

Sæll Jóhann. Þetta er vel orðað í innleggi þínu, og ég er sammála þessu.

Þessvegna segi ég það, að ef Sigmundur Davíð kemst til valda eða einhverjir sem hafa áhuga á öðru en eigin völdum, þá vonandi fer fólk að sinna lýðræðinu betur með því að verða virkara. Það þarf yfirvöld sem reyna meira og af alvöru fyrir fólkið.

[Ingólfur Sigurðsson, 11.5.2023 kl. 23:47]

Sæll Guðmundur Örn. Ég er algjörlega sammála um að þessi ráðstefna er til skammar og til að upphefja myrkravöldin. Ekki á að sýna neinn skilning á nema annarri hliðinni, sem þýðir stríðsvilji og stríðsyfirlýsing.

Einnig tek ég undir þetta með Trump. Jafnvel finnst manni eftir því sem léleg stjórnsýsla Joe Biden kemur betur í ljós, að Donald Trump verði mikilvægari og mikilvægari sem Guðs maður, sá sem verndar heimsbyggðina frá svona hryllilegum atburðum.

En það vona ég að einhver reyni að krefjast friðarvilja af Selenskí, ef hann mætir á fundinn. Það ætti að gera þá kröfu á íslenzk stjórnvöld að Rússum verði boðið með á fundinn, og að tilgangur hans verði friðarviðræður en ekki stigmögnun. 

Selenskí er algjörlega forhertur. Ég sá það í kvöldfréttunum að hann sagði við Breta að ekki verði samið um neitt, og að ekkert verði gefið eftir. 

Ég veit ekki hvort hægt er að biðja fyrir því þannig að dugi að stríðsherrarnir geri friðarsamninga sem duga og skipti landinu þannig að allir gæti sætt sig við það, en það þarf að gera.

Takk fyrir gott innlegg eins og oft áður.

[Magnús Sigurðsson, 12.5.2023 kl. 06:54]

Góður pistill eins og svo oft áður Ingólfur.

Fyrirsögnin hefði allt eins getað verið gamalt vín á nýjum belgjum.

Það hefur allt verið á sömu bókina lagt um óra tíma og Íslendingar ganga refjalaust í gúlagið.

[Ingólfur Sigurðsson, 12.5.2023 kl. 12:49]

Takk fyrir innlitið Magnús. Já, það hefur flest eða allt verið á sömu bókina lært um óratíma, en þó keyrir um þverbak þessa síðustu áratugi og ástandið versnar, óstjórnin verður meiri. Ég er að bíða eftir að þú skrifir snilldarlegan pistil um reykspúandi ráðherrana á einkaþotunum sem mæta á ráðstefnur sem engu skila nema verra ástandi. Þú hefur oft skrifað þannig pistla sem aldrei hafa átt betur við en nú.