Fliss hjá Gísla Marteini er yfirklór og kattarklór eins og venjulega

Þessi frétt um að umframdauðsföll hafi verið flest á Íslandi, sem hefði átt að vera fyrsta frétt á öllum fjölmiðlum þegar hún birtist er án efa ein merkasta frétt ársins, það sem af er þessu ári. Í stað þess að þetta komi í kvöldfréttum Rúv þá er það yfirklórið og kattarklórið sem maður bjóst við sem troðfyllir öll vit þannig að áhorfandinn verður vitskertur og engu nær, og gjörsamlega dofinn af fréttaruglinu þar og klikkaður verður hver sem trúir þeim áróðri, að fréttum loknum, sem boða ranga túlkun, ranghugmyndir og firrur, eins og Gunnar Rögnvaldsson hefur fjallað um.

Þótt ég sé ekki hlynntur fjölmenningarpólitíkinni í ESB og dragi ekki dul á það, þá var það Eurostat, eða Evrópska hagstofan sem kom með þessar upplýsingar, og þar á kannski við orðtakið, "glöggt er gests augað". Alma hjá embætti landlæknis á Íslandi telur þetta að sjálfsögðu rangt, því með þessu er vegið mjög alvarlega að starfsheiðri hennar og vinnunni í Þríeykinu, og að öllum sem að þessu bólusetningarmáli komi á Íslandi.

43% fleiri létu lífið í desember eftir sprautu 2022 en 2016 til 2019. Samkvæmt þeirri tölfræði var hlutfall umframdauðsfalla hvergi hærra í Evrópu en hjá okkur.

Umframdauðsföllin eru ekki allt. Sá gríðarlegi fjöldi sem varð veikur eftir sprauturnar er ekki inní þessum tölum, enda spítalarnir fullir sem aldrei fyrr og ónæmiskerfi landsmanna ekki bara veiklað heldur í rúst.

Allir þeir sem fjölluðu um þetta af gagnrýni hér á blogginu og annarsstaðar í þjóðfélaginu ættu að fá viðurkenningar frá þjóðfélaginu, en ekki Þríeykið eða aðrir í því liði. Þátturinn Stormur, sem er áróðursefni í heimildamyndaformi á Rúv, mun án efa fá verðlaun, til að staðfesta enn þessa fjölmiðlatúlkun án gagnrýni, klapp á bakið fyrir að hafa stuðlað að þessari þjóðernishreinsun á Íslandi, sem undir venjulegum kringumstæðum hefði verið lögsótt fyrir.

Jón Magnússon Hæstaréttarlögmaður skrifaði góðan pistil nýlega um það hvernig Jacinda Ardern fyrrverandi forsætisráðherra Nýja Sjálands sagði af sér embætti, sem áður var vinsæl fyrir að hafa forðað landsmönnum frá smiti, en hann færði rök fyrir því hvernig lokunarstefna hennar hefur án efa stuðlað að því að hún varð frá að víkja úr sínu embætti vegna óvinsælda í kjölfarið.

Á Íslandi er Katrín Jakobsdóttir orðin mjög umdeild skyndilega, hún sem áður var vinsælasti stjórnmálamaður landsins, og flokkur hennar, Vinstri grænir í lægstu lægðum og gæti dottið út af þingi ef nú yrði kosið, og stjórnin kolfallin væntanlega einnig.

Já, fólk hefur rökstutt að eitthvað hafi þetta með umframdauðsföllin að gera eða þá að annað spili inní líka, eins og brotthvarf frá fyrrverandi hugsjónum Vinstri grænna, andstaðan við Nató sem ekki er lengur til staðar og lélegur árangur í umhverfismálum, miðað við það sem fylgismenn flokksins fyrrverandi vonuðust til.

Talað er um bakslag í femínismanum þegar áberandi konur missa fylgi sitt og segja af sér í kjölfarið. Ætli það sé ekki frekar endanlega búið að sannast að röng er sú firra sem haldið var fram að konur stjórnuðu betur en karlmenn yfirleitt?

Víðir úr Þríeykinu var hjá Gísla Marteini í gærkvöldi, og það er alveg dæmigert að þannig sé hann að styðja við söguskoðun Rúv og þeirra áróður um þeirra túlkun á kófinu.

Rúv reynir að búa til hæp (það er slangur úr ensku) þess efnis að móðursýkin útaf kófinu hafi verið réttlætanleg, þótt veruleikinn hafi sannað að svo var ekki.

Hvernig á að þýða orðið hæp fyrir það fyrsta? Fjölmiðlasöguskýring, tízkubóla. Þýðingin er á ensku: "To advertise or praise something a lot in newspapers, or television, online, etc". Að auglýsa eða lofa eitthvað mjög mikið í tímaritum, sjónvarpi, á netinu eða fleiri vígstöðvum".

Hype merkir einnig á ensku eiturlyfjaneytandi, auglýsingastarfsemi, öfgar, ýkjur og ofhvörf, og á það vel við. Sögnin að fíkla finnst mér eiga bezt við. Rúv er að fíkla (eins og að fífla) áhorfendur til að halda að þeirra túlkun á kófinu sé rétt.

Þau hjá Rúv eru með sérstakan áróðursþátt sem nefndur er heimildaþáttur sem heitir Stormur og fjallar um kófið, og þess gætt að ekkert sé lært af reynslunni, að engin ályktun sé dregin af því að flest umframdauðsföll hafa orðið á Íslandi eftir bólusetningarnar af öllum löndum heimsins (þótt sú tölfræði sé dregin í efa, en það var að minnsta kosti í fréttum með þessu orðalagi).

Já, á Rúv er alvarlegum ásökunum um að hylma yfir með stórfyrirtækjum með myrkan ásetning um fækkun mannkynsins svarað með taugaveiklunarhlátri og gert er grín að öllu saman eða látið eins og sú gagnrýni sé ekki til.

Fólk sem þáði sprauturnar og lifði af vill ekki viðurkenna að veikindi sín séu þeim að kenna, jafnvel þótt það hafi verið við dauðans dyr eða sárveikt. Jafnvel þegar bent er á að líkur séu á að undarleg dauðsföll einhverra sem maður kannast við séu kannski útaf aukaefnum í líkamann sem hann réð ekki við, þá er talinu eytt og flissað að öllu saman.

Lögmaðurinn Arnar Þór Jónsson hefur fjallað skynsamlega um þetta efni og í orðum hans er þungi og vigt, það er tekið mark á honum, hann hefur verið í pólitík og gegnt ábyrgðarstöðum í þjóðfélaginu.

Þessvegna segi ég það, umræðan um þetta er bara rétt svo að byrja, jafnvel þótt Rúv vilji sópa öllu undir teppið og flissa að öllu saman.

Þorsteinn Siglaugsson hefur einnig skrifað af einstaklega miklu hlutleysi og skýrleika um þessi mál, og tekið langt framúr Rúv og slíkum sem hafa misst sitt hlutleysi fyrir löngu.

Það er ekki við öðru að búast en að áróðursveiturnar sem vildu láta fólk kaupa ákveðna heimssýn haldi því áfram.

En, þetta er rétt svo að byrja. Spurningin um frelsi, lýðræði og mannréttindi er spurningin um að fólk leiðrétti rangar túlkanir á þessum faraldri og að ekki sé hægt að komast upp með að gera fólki þetta. Það hlýtur að vera krafan, annars er allt réttlæti fortíðarinnar að engu orðið. Réttlætið endar ef það hættir að virka í nútímanum.

Segja tölfræði um umframdauðsföll ranga