DV er með frétt ársins, um mögulegar aftökur ofbeldissveita í Úkraínu á ýmsum olígörkum og fleirum, og að baráttan gegn falsfréttum sé yfirskin fasisma og kúgunar, í anda 1984 eftir Orwell.

Ég vil benda á merkilega grein í DV sem heitir "Dauðalistinn og tjáningarfrelsið".

Þar kemur margt fram. NATÓ byrjaði að móta vestrænan áróður í Úkraínu strax 1997, með undirritun sáttmála NATÓ og Úkraínu um samstarf.

Önnur DV grein um þetta er einnig merkileg: "Enn einn rússneskur oligarki bættist á dauðalistann". Hún fjallar um hvernig ríssneski olígarkinn Dmitry Zelenov dó á dularfullan hátt og var á dauðalista sérsveita í Úkraínu.

Í DV greininni eru samsæriskenningar viðraðar um að Pútín hafi látið drepa hann og fleiri úr liði Rússa sem þannig hafa dáið með voveiflegum hætti. Líklegra er þó að Zelenskí hafi gert það eða aðilar á vesturlöndum. Um 15 rússneskir olígarkar hafa dáið síðan stríðið byrjaði, segir í fréttinni. Svo virðist sem eitrað hafi verið fyrir honum og hann síðan rotaður til bana eða hrint niður stiga.

Darina Dugina, fréttakona og nátengd valdhöfum Pútíns var drepin með bílasprengju 21. ágúst á þessu ári.

Azov nazistarnir eru taldir standa fyrir þessum drápum á háttsettum Rússum og dauðalistinn nær yfir fólk af mörgum þjóðernum. Evrópusambandið hefur verið máttlaust í gagnrýni á þetta.

200.000 eru taldir á þessum dauðalistum, og Úkraínumenn sem standa fyrir þessu eru í samvinnu við aðila útum allan heim í tengslum við upplýsingaóreiðu.

Það skuggalegasta er að þetta er samvinnuverkefni víða um heim. Í tenglum DV fréttarinnar er því lýst að Göbbels hafi kennt þessar aðferðir, og baráttan gegn upplýsingaóreiðu sé jafn fasísk og baráttan gegn óvinum Þriðja Ríkisins var.

Þessi stórmerkilega DV grein setur Úkraínustríðið í alveg nýtt ljós. Hallur Hallson hefur fjallað um þetta á Útvarpi Sögu, og eitthvað örlítið vissi ég um þetta frá öðrum bloggurum, en hér er myndin gerð fyllri, og það er rökstutt þannig að ekki verður um villzt að vestræn áhrif í Úkraínu byrjuðu mun fyrr en 2014, jafnvel 1997 eða enn fyrr, sem setur þetta allt í nýtt ljós.

Vestrænn stuðningur við Úkraínu hlýtur að virka vafasamur í þessu ljósi.

Baráttan gegn upplýsingaóreiðunni er hluti af málflutningi Demókrata í Bandaríkjunum. Nú er verið að reyna að dæma Donald Trump og sem flesta sem með honum hafa starfað, og þær ásakanir virðast þó á veikum grunni byggðar þegar svona fréttist og kemur uppá yfirborðið, sem lætur mann finnst Demókratar natzistar nútímans en ekki Repúblikanar, því ef það er rétt að fólk sé í alvöru drepið fyrir það að breiða út svonefndar falsfréttir, þá er það annað og meira en að gera tilraun til valdaráns, eins og Donald Trump og hans fólk er sakað um.

Í DV greininni er minnzt á Birgi Ármannsson sem virðist gera sér ljóst að íslenzkir ráðherrar þurfa að gera sér grein fyrir því að hér er lýðræðið í hættu, og af fleiri aðilum en Donald Trump og Repúblikönum.

Loksins er DV með tímamótagrein um þetta. RÚV ætti líka að fjalla um þessa hlið málsins. Það hefur þá skyldu gagnvart sínum áhorfendum og hlustendum.

ESB búið að minnka gasnotkun um 20%

Athugasemdir

[Theódór Norðkvist, 21.12.2022 kl. 11:07]

Einkennileg samsuða uppspuna, ágiskana út í loftið og samsæriskenninga. Það sem skiptir máli í þessu samhengi, er að Rússland er að fremja þjóðarmorð og stríðsglæpi um alla Úkraínu. Árásir á innviði lands s.s.orkuveitur, eru stríðsglæpir sem ber að refsa fyrir. Þegar þeirri vinnu er lokið og búið að draga Pútín og undirsáta hans fram fyrir alþjóðlega dómstóla, er hægt að snúa sér að listamönnum sem setja saman dauðalista í bílskúrnum heima hjá sér, ekki fyrr.

[Theódór Norðkvist, 21.12.2022 kl. 11:25]

Annars athyglivert að lesa um þennan lista á Wikipedia.

https://en.wikipedia.org/wiki/Myrotvorets

Kemur m.a. fram að Roger Waters úr Pink Floyd lenti á listanum. Ég ætla að vona að næsta nafn sé EKKI Ingólfur Sigurðsson.

[Ingólfur Sigurðsson, 21.12.2022 kl. 15:06]

Teddi minn, ef Vesturlönd eru með í því að taka fólk af lífi sem er ekki sammála stefnu þeirra, þá eru Vesturlönd ekki það sem vert er að berjast fyrir, frelsi, lýðræði, mannréttindi, og eitthvað slíkt.

Nei, greinin í DV er annað en ágizkanir og samsæriskenningar. Hún er algjörlega í samræmi við málflutning Selenskís í hans málflutningi á RÚV og víðar, um að Rússar séu hryðjuverkaríki. Það er hægt að segja að svo sé að vísu, en það afsakar ekki Vesturlönd og með Úkraínu í broddi fylkingar að haga sér eins og fantarnir í ríki nazismans gerðu. 

Þegar búið verður að draga Pútín fyrir dómstóla, verður þá nokkur vilji að hreinsa til á Vesturlöndum?

Ekki ef ógnarstjórnin heldur áfram á Vesturlöndum og magnast. 

Þetta líf er ekki svo langt á þessari jörð, Theódór, og ef maður ver því í eitthvað nytsamlegt eins og að berjast fyrir einhverju sem hjálpar fólki að losna úr kúgun þá hefur maður gefið því tilgang, hvort sem maður verður drepinn eða ekki. 

Þessi dystópía er þannig að mennsku er ekki vært í henni. Hvar verður lífslöngun þeirra sem fá að tóra?

Það lítur út fyrir að margt sem kallað var samsæriskenningar sé það ekki.

[Theódór Norðkvist, 21.12.2022 kl. 16:43]

Hvað hefurðu fyrir þér í að Vesturlönd séu að taka þátt í að lífláta fólk? Lestu greinina sem ég gaf þér tengil á. Þar kemur fram að SÞ, ESB og G7 (iðnríkin 7) hafi öll sömul farið fram á að þessari Myrotverets vefsíðu yrði lokað.

Dómsvöld í Úkraínu hafi hinsvegar úrskurðað að síðan brjóti ekki gegn neinum lögum og því ekki hægt að loka henni. Hvort hún sé lögleg en siðlaus, við getum alveg tekið þá umræðu ef þú vilt. Forráðamenn síðunnar ákveða hinsvegar ekki hvað bærist í hugum sjúkra einstaklinga úti í bæ.

Auðvitað má harma líflát blaðamanna, en ef þessir sömu blaðamenn studdu opinberlega hryðjuverkasamtökin í Kreml, þá má færa rök fyrir því að þeir hafi haft enn fleiri mannslíf á samviskunni, en einhverjir vefsíðuhönnuðir, ef menn vilja meina að Myrotverets vefsíðan hvetji til manndrápa.

Þessi hryðjuverkasamtök hafa drepið tugþúsundir (þ.á.m. eigin hermenn) og lagt líf tugmilljóna karla, kvenna og barna í rúst. Fyrir utan þá kreppu sem við öll finnum fyrir, m.a. ég með því að hýrast í 17 stiga hita inni við.

A.m.k. finnst mér langsótt að kenna þessari vefsíðu um ef einhver drepur mann. Enn langsóttara að segja að Vesturlönd í heild séu þátttakendur í þeim morðum. Fjöldamorðinginn Charles Manson á að hafa sagt að Hvíta albúmið eftir Bítlana hafi verið honum innblástur að drepa fólk. Hefur einhverjum dottið í hug að fullyrða að Bítlarnir séu samsekir að fjöldamorðum Mansons?

[Ingólfur Sigurðsson, 22.12.2022 kl. 02:17]

 Guðmundur Örn, takk fyrir ágætt ljóð sem á enn við. Það kemur með frekar hlutlausa nálgun, að í stríðum tapa allir nema þeir sem græða peninga á þeim.

Theódór, ég er búinn að renna yfir Wikipediagreinina í tenglinum. Wikipedia er ágæt upplýsingaveita uppað vissu marki, en hún kemur ekki með aðra mynd en er opinber (það er að segja samsæriskenningar eru ekki ítarlegar eða fróðleikur sem er mjög andstæður elítunni), nema ítarlegri, og vissulega geta þar verið upplýsingar sem eru sjaldgæfar, en studdar þó. Gallinn við wikipediu er að stundum og oft er meira af upplýsingum sem þar rata ekki inn, þeir taka ekki við því sem kallað er frumrannsóknir, það verða að vera margar heimildir fyrir efninu.

Það kemur mér ekki á óvart að SÞ, ESB og G7 hafi farið fram á lokun síðunnar, opinberlega að minnsta kosti. En ég er allavega búinn að fylgjast með pólitík svo lengi að ég veit að ástandið er enn eins og í kalda stríðinu að því leyti að í póltík er ekkert eins einfalt og sagt er á yfirborðinu. Þrýstihópar berjast undir niðri, ekki er auðvelt að vita með vissu hvað gerist undir niðri, hvort sem það er kallað Djúpríkið eða eitthvað annað, sem er gott heiti.

Þetta er ekki bara spurning um hvort hvatt sé til manndrápa á þessari vefsíðu. Það ískyggilega er normið sem reynt er að koma á, að það sé eðlilegt að þagga niður í þeim sem standa með Rússum.

Ég er sammála þér með Manson og Bítlana. Hann ber aleinn ábyrgð á sínum gjörðum. Helter Skelter er lag um rennibraut og ótta æskuáranna, og í textanum er hvergi talað um voðaverk.

Þessi vefsíða fjallar um miklu meira en stríðið við Rússa, eða innrás Rússa eða hvað sem menn vilja kalla þetta, fjöldamorðin á Úkraínumönnum, sem eru forkastanleg. 

Þessi vefsíða kallast á við margt af því skuggalegasta sem fram hefur komið í vestrænni menningu á síðustu árum og er kallað "upplýsingahryðjuverk!" Þeir sem hræðast upplýsingar eru yfirleitt þessir sem beita morðfýsi og gerræði. 

Þessi síða er aðeins toppurinn á ísjakanum. Hún opinberar veruleika í fyrsta lagi og svo hugarfar í öðru lagi. Vefsíðan er ekki ímyndun, hún er ekki samsæriskenning, hún er veruleiki.

Miklu nærtækara dæmi til samanburðar eru umræddir hægriöfgamenn sem reynt er að setja lög gegn, bæði á alnetinu og í raunheimum. 

Hversvegna er allur heimurinn móðursjúkur útaf slíkum hægriöfgum en ekki þjóðerniskennd þessara einstaklinga sem eru með þessa vefsíðu, og sem svo sannarlega eru vopnum búnir og taka fullan þátt í stríðinu gegn Rússum?

Nú hefur Biden stjórnin látið loka tugþúsundum vefsíða á vegum Repúblikana á grundvelli upplýsingaóreiðu og sömu röksemda eða falsröksemda og koma fram á þessari vefsíðu í Úkraínu. Þetta er hápólitískt mál.

Þú talar um Rússa sem hryðjuverkamenn. Þannig var þetta ekki í upphafi. Pútín vann með heimsbyggðinni lengi en hann hefur sýnt það að hann er harður. Hann vill vinna sín stríð.

Þú skrifaðir: "A.m.k finnst mér langsótt að kenna þessari vefsíðu um að einhver drepur mann".

Svar mitt er þetta: Vefsíðan lýsir hugarfari, menningarástandi, veruleika. Þeir sem skrifa um ofbeldi taka ekki endilega þátt í því sjálfir, eða þeir sem hvetja til þess. En þetta á erindi til almennings, að gera sér grein fyrir því að grimmdin er mikil á báða bóga. Vefsíðan bendir sterklega til þess að tengdir aðilar henni standi á bakvið lögbrot og ofbeldi.

Þú skrifaðir: "Enn langsóttara að segja að Vesturlönd í heild séu þátttakendur í þeim morðum."

Svarið við þessu er tvíþætt: Í fyrsta lagi er það alveg óumdeilanlegt að andlega og siðferðislega eru Vesturlönd í heild þátttakendur í morðum á pólitískum andstæðingum sínum, og skiptir þá engu máli hvort í því felst að svelta Afganista til bana sem ekki eru Vesturlöndum þóknanlegir eða hvetja óbeinlínis til morða á áhrifamönnum innan núverandi stjórnkerfis Rússlands. Áróðurinn í vestrænni pressu er ekki hlutlaus. Hann er miskunnarlaus og einhliða.

Hitt er samsæriskenning en ekki endilega langsótt að leyniþjónustur Vesturlanda eða aðilar innan þeirra taki þátt í þessum morðum. Það gerðist í kalda stríðinu, og menn hafa engu gleymt. 

Stríðið hefði aldrei átt að hefjast, ég er sammála þér um það að afleiðingar þess eru hörmulegar. Menn á Vesturlöndum hefðu átt að sjá þetta fyrir og reyna að afstýra þessu. 

Stríðið í Úkraínu er risastór atburður í mannkynssögunni, en hér er enn meira í húfi, sem er lýðræði og mannréttindi, og ég er ekki sannfærður um að Vesturlönd séu hreinn og saklaus engill í því sambandi. 

En þú ert rökfastur og beittur og kannt að benda á atriði sem erfitt er að svara fyrir.

Friðarsamningar þýða að báðir aðilar þurfa að láta af sínu. Pútín hefur margt á samvitzku sinni, en ef menn vilja koma á stöðugu ástandi þarf að geyma refsingar í bili og gera einhverja friðasamninga sem virka, og vel má vera að Rússar steypi honum sjálfir af stóli. Þar er nú órólegt ástand líka undir niðri.

[Theódór Norðkvist, 22.12.2022 kl. 10:40]

Þakka svör. Ég er ekki eins sannfærður og þú um einhverja ósýnilega þræði milli Vesturlanda og öfgaafla í Úkraínu. Þú veist kannski eitthvað sem ég veit ekki. Það sem mér finnst skipta máli, er að Úkraína er fórnarlambið, sá sem var ráðist á og Rússland er gerandinn, sá sem réðist inn. Þess vegna er rétt að standa með Úkraínu. Það er ekki þar með sagt að við styðjum öll þau óhæfuverk sem eru framin í landinu (af Úkraínumönnum.) Jafnvel þó okkur væri sama um þjáningar fólksins í Úkraínu, eigum við að standa með þeim, einfaldlega vegna þess að við getum verið næst.

Ég átta mig ekki á hvernig við erum að svelta fólkið í Afganistan til bana, er það ekki aðallega Afganistan sem er að svelta Afganistan til bana? Las einhvers staðar að ekkert land í heiminum fær meiri þróunaraðstoð, en ekkert land er vanþróaðra. Með snarbrjálaða hellisbúa við völd, þó þeir séu leiknir með hríðskotabyssur.

Að lokum, er sammála þér um Wikipediu, en ég myndi nú gagnrýna þá fyrir flest annað en að krefjast heimilda til að fá efni birt, t.d. vinstri slagsíðu. Það er ágætt að stunda frumrannsóknir, en þangað til traustar heimildir eru lagðar fram fyrir birtu efni, er um að ræða getgátur. Geta verið sannar, geta verið ósannar.