Skaupið var býsna gott og faglegt - en bitlaust gagnvart pólitíkinni og ríkisstjórninni.

Ekki þýðir að ímynda sér að allt sé sagt og maður nenni ekki að blogga. Kannski ég byrji aftur á Fébókinni á nýju ári fyrir alvöru. Mér tekst kannski að missa áhugann á því skrýtna, samsæriskenningum og slíku, og þá á ég auðveldara með að taka Fésbókarfjasið í sátt, sem mér hefur fundizt of mikið miðjumoð fram að þessu.

 

En að skaupinu. Anna Marsibil dagskrárgerðarkona lýsti því bezt í nýju Kastljósi á RÚV í gær á þann hátt að það hafi verið gott en of ópólitískt og bitlaust fyrir sinn smekk. Fleiri sögðu þetta sama, að skaupið hefði þróazt í ópólitíska átt síðastliðin ár, með þessum leikstjórum sem hafa séð um það síðastliðin ár. Mjög hæfur hópur, en ekki jafn pólitískur og Spaugstofan var. Spaugstofan er heilagt viðmið þegar kemur að gríni nú til dags, því þeir voru grínkóngar um langt árabil, eftir að Radíusbræður, Halli og Laddi, Ómar Ragnarsson, Jón Gnarr og fleiri voru ekki lengur það nýjasta og ferskasta í grínheiminum, eins og verið hafði fram að því. Spaugstofan hélt vinsældum og virðingu þar til um 2010 þegar þeir lögðu upp laupana endanlega, því miður, eftir takmarkaða endurkomu á Stöð 2.

 

Þá kemur aftur þessi spurning sem kom upp: Á Skaupið að segja eitthvað eða vera bara skemmtun og afþreying?

 

Þá kemur upp spurning sem er þessu tengd: Er það hollast fyrir ágætan forsætisráðherra okkar Katrínu Jakobsdóttur og Vinstri græna að fá ekki sama aðhald og Spaugstofan veitti?

 

Ég tel að Vinstri græn og hinir tveir flokkarnir hafi staðið sig framúrskarandi vel við að halda saman þjóðinni á erfiðum tímum. Mörg mál voru samt umdeild á kosningatímabilinu, fóstureyðingarlög Svandísar Svavarsdóttur bera einna hæst í því sem kalla mætti mistök, og skimunin sem send var til útlanda, og nefna mætti umdeilt þjóðgarðamálið og mörg fleiri mál. Það var ekki farið inní dýptina á þessum málum í skaupinu, og margt af þessu fullkomlega hunzað, sem er vissulega galli á skaupinu, sem gerir vanalega upp svona mál um áramótin, fellir dóma, í formi gríns.

 

Það var almennt ekki farið á dýptina í skaupinu og það var helzti gallinn. Maður gat ekki skellihlegið að því, en maður gat flissað, glott, brosað og smáhlegið, næstum allan tímann. Nokkuð góður árangur, en of bitlaust skaup? Já, það er réttmæt gagnrýni.