Þetta er rétt svo að byrja, ekkert kannski með það. Virknitímabilið er nýbyrjað, birtingarmyndirnar verða fjölbreytilegri, sumar verri og ljótari

Ég var of ungur þegar Vestmannaeyjagosið varð, ég var þá 2 ára og á 3. ári til að muna í smáatriðum eða skýrt eftir því, en ég man vel eftir bókinni sem var til á heimilinu um það með myndunum, og hvernig talað var um það af foreldrum mínum og öðrum. Ég man mjög greinilega eftir stemmningunni og dulúðinni í kringum atburðinn, og hversu ótrúlegt fólki fannst þetta sem gerðist. Trúin á álfa og huldufólk og náttúruvætti lifnar við svona atburði, og veðurguði og hvaðeina.

Við könnuðumst við fólk sem fór að byggja upp eftir gosið og þannig fékk maður að heyra samtöl um uppbygginguna og fréttir, og svo í blöðum. Einnig man ég vel eftir fréttum Ómars Ragnarssonar, allavega af Kröflueldum, þegar hann sveimaði um á Frúnni og allskonar fréttum um náttúruna sem hann gerði.

Mér finnst það Ómari Ragnarssyni til hróss að hann var með þeim fyrstu að benda á líkindin við Kröflugosin hér á bloggsíðunni sinni.

Ég man eftir því að fólk beið í ofvæni eftir því að uppbyggingin gæti aftur byrjað í Heimaey, og mér finnst í minningunni aldrei efi eða hik í uppbyggingarviljanum.

Síðan eru það lögin hans Oddgeirs Kristjánssonar. Platan fræga með Sextett Ólafs Gauks var mikið spiluð.

Nú finnst mér ljóst að staðan sé breytt, því vísindamenn hafa gefið það upp að nýtt virknitímabil er hafið á öllu Reykjanesinu sem gæti tekið mörg hundruð ár. Þannig var staðan ekki þegar gaus í Heimaey. Eðlilegt er að gera nýjar áætlanir hvar byggð er heppilegust á þessu landi.

Það kom í fréttum í gær að síðast gaus í Grindavík nákvæmlega á þessum stað fyrir hvorki meira né minna en 2000 árum, eða þegar Kristur var smábarn, ef sú tímasetning er rétt og ef það eru meira en mýtur, hvað kemur fram í Biblíunni um hann, en ég vil raunar halda að það séu meira en mýtur.

Hvað er það sem veldur því að Ingólfur Arnarson nafni minn fær að ráða því að langflestir Íslendingar búa á þessu svæði? Líkindin á að hann hafi verið til og sá sem hann er sagður hafa verið, fyrsti landnámsmaðurinn af norrænum uppruna með fasta búsetu eru allavega jafn mikil og líkindin á tilveru Jesú Krists og að hann hafi verið sá sem hann er sagður hafa verið.

Ingólfur Arnarson verður að teljast langmesti og langstærsti áhrifavaldur Íslandssögunnar, ég held að það verði ekki frá honum tekið, ef það er honum að kenna eða þakka að við erum flest stödd hér á þessu horni landsins, en hann er hér talinn hafa byggt sér bú.

Já hvílík áhrif, að flestir herma eftir honum, að vilja búa hér en ekki annarsstaðar á landinu!

Ég hef einnig haft sérstakan áhuga á honum því hann er talinn hafa verið sérlega vel heiðinn maður og fyrirmynd í trúmálum þess tíma. Þar með má vera fullviss um að hann hafi þekkt fræðin sem Einar Pálsson rithöfundur fjallaði um, og verið með völvur og spákonur í þjónustu sinni og vinnu hjá sér, til að vita um framtíðina og annað slíkt.

Þetta heiðna samfélag landnámsmannanna hefur því verið hámenningarlegt og fræðasamfélag. Þetta fólk þekkti goðsagnir, rúmfræði, stærðfræði, stjörnufræði, jurtafræði, dýrafræði, sögu, það tók þátt í alheimsmenningu þess tíma, en hafði ímigust á kristninni sumt, en ekki allt.

Bækur voru til og skrifaðar á köfl, eða rúnakefli úr birki, reynivið, blæösp eða öðrum trjátegundum, tálguðum til þannig að hægt var að rista á keflin rúnir. Oft voru rúnirnar lykilorð í kvæðum, eða fyrstu orðin, og síðan allt hitt lært utanbókar, orð fyrir orð, og þess gætt að allt væri rétt eftir haft, og refsingar lágu við því að goðlasta, eða fara rangt með heilög kvæði um guðina.

Æðri mannkyn eru til sem hafa áhrif á náttúruhamfarir hjá okkur, bæði til góðs og ills. Helstefnumannkyn og einstaklingar þeirra valda hér náttúruhamförum eða gera þær verri og mannskæðari á meðan lífstefnumannkyn sem okkur eru hliðholl gæta okkar fyrir öflum náttúrunnar eftir megni.

Sagan um goðin sem reiddust er ekki úr lausu lofti gripin og heldur ekki um Loka sem bíður bundinn í helli og eiturdroparnir sem skella á honum úr nöðrunni, þegar Sigyn hellir úr skálinni með eitrinu.

En það sem fólk veit ekki að þetta er líka táknmál, því Loki gengur laus og liðugur um heimsbyggðina og stjórnar henni þar sem helstefnan ríkir eins og hér. Hann er aðeins bundinn að því leyti sem við erum vernduð fyrir honum, eða henni öllu heldur. Eldri heimildir um hann herma að hann hafi verið kvenkyns, gyðja að nafni Loka. Nafnið þýðir jörð eða reikistjarna orðsifjafræðilega og kemur úr sanskrít, svo ævaforn er þessi speki og stórmerkileg.

Síðan er tröllskessan Loka orðin að Loka á miðöldum í meðförum Snorra Sturlusonar. Ekki er vitað hvenær sú kynbreyting varð. Kannski voru þau hjón eins og Vanir, sem giftast systrum sínum með sama nafni, eins og Freyja og Freyr til dæmis.

Við lifum með því stilliafli sem við höfum skapað, með syndum eða góðverkum og dáðum.

Grindvíkingar eru því eins og Kristur á krossinum. Þeir eru að þjást fyrir okkur hin á meðan hörmungarnar beinast að þeim.

Seinna kemur að því að stórir skjálftar upp á 6 eða jafnvel 7 verða nálægt Reykjavík. Þá mun refsingin dynja á okkur hinum, ef við verðum hér enn.

Það er ekkert kannski með það, heldur bara hvenær eða hvar. Og miklu fleiri litlir atburðir, eldgos og jarðskjálftar, og stærri gos en þetta. Allt bíður þetta í framtíðinni og miklu meira.

 

„Mikið sjokk þegar ný sprunga myndaðist“