Ísland hefur misst mikinn stjórnvitring, Jóhannes Björn Lúðvíksson

Snillingurinn Jóhannes Björn Lúðvíksson er fallinn frá, einn frægasti samsærisáhugamaður Íslands. Mjög saknaði ég þess að hann skyldi ekki fenginn í Silfur Egils undanfarin ár, þar sem æskudýrkunin er farin að ráða frekar en vizkan.

Maður fylltist af aukinni aðdáun á honum þegar hann varaði við kreppunni fyrir 2008, auk þess sem hann var einn af rithöfundahetjum bernskuáranna, en bókin hans, Falið vald, var til á mínu æskuheimili, og las ég hana eins og margt annað fróðlegt og áhugavert.

Ég er viss um að hann hefði verið fær um að hrista upp í brestum skeknum samtíma okkar, ef hann hefði verið fenginn í Silfrið, en ekki áherzla lögð á þá sem kafa ekki djúpt í þjóðmálin og heimsmálin.

Til hvers er að vita af svona snillingum ef þeir fá ekki að láta ljós sitt skína í fjölmiðlum á meðan þeirra nýtur við og þeir eru á lífi? Hann var sorglega hógvær þessi síðustu ár sem hann lifði og skrifaði ekki jafn mikið í vefritin, því miður. Ég las þó stundum eftir hann færslur á Fésbókinni, og voru þær frábærlega skrifaðar, af þekkingu og innsæi, eins og við var að búast frá honum.

Vonandi að hann njóti góðrar uppskeru í framlífinu á framlífshnetti. Þessu tengt er að frétt vakti athygli mína í RÚV eða Stöð 2, um að einhver tók sig til og auglýsti störf sem aðeins væru fyrir 50 ára og eldri. Frábært framtak til að vinna gegn æskudýrkuninni skaðlegu.

Athugasemdir

[Guðjón E. Hreinberg, 23.3.2022 kl. 18:08]

Blessuð minning.

Blessuð minning.